Nur-Sultan qalasynyń bilim basqarmasynyń basshysy Sholpan Qadyrova astanada biyl oqýshylardyń mektep bitirý tártibi qalai bolatynyn aityp berdi, dep habarlaidy QazAqparat.
«25 mamyrda barlyq mektepte oqý jylynyń aiaqtalatyny belgili. Pandemiia kezinde qashyqtan oqytý formatyna bailanysty memlekettik qorytyndy emtihandar ótkizilmeidi. Jyldyq baǵalaýdy ótkizý úshin usynylǵan ádistemelik usynymdardy eskere otyryp, mektepterde bólim boiynsha jiyntyq jumystary jáne toqsan boiynsha jiyntyq jumystary júrgizildi. Búgin 22 mamyrda Balapan, Elarna telearnalarynda 11 synyp bitirýshi túlekterge arnalǵan kásiptik baǵdar berý boiynsha biryńǵai telesabaq kórsetilýde. Biyl mektep bitirý is-sharasy «Birgemiz: Túlek-2020» uranymen ótedi», - dep habarlady Sholpan Qadyrova Nur-Sultan qalasy ákimdiginiń Facebook paraqshasynda onlain rejimde ótken baspasóz máslihatynda.
Onyń aitýynsha 25 mamyr kúni saǵat 11.00-de barlyq mektepte múmkindiginshe ata-analardyń, qamqorlyq keńes músheleriniń, biznes ókilderiniń, mektepti úzdik bitirgen burynǵy túlekterdiń qatysýymen 1-10 synyptarǵa arnalǵan onlain sońǵy qońyraý ótkiziledi. Telearnalar arqyly Bilim jáne ǵylym ministri Ashat Aimaǵambetov túlekterdi quttyqtaidy. Sol kúni atalmysh shara ońtaily keste boiynsha ótedi.
«Al 3 maýsym kúni barlyq mektepterde 11 synyp túlekteri úshin attestattar men «Altyn belgini» tapsyrý rásimi ótedi. Is-shara mektep aýmaǵynda, ashyq aspan astynda uiymdastyrylady. Mektep bitirýshilerdiń mektep formasymen qatysýy qatań túrde eskertiledi. Saltanatty rásimnen keiin «Túlekter alleiasynda» tal egý josparlanyp otyr. Mektep bitirý is-sharalaryn ótkizý kúnderi mektep ákimshiligine quqyq buzýshylyqqa jol bermeý, sanitarlyq jáne epidemiiaǵa qarsy rejimdi qatań saqtaý sharalary júkteldi», - dedi basqarma basshysy.
