8-14 qańtar aralyǵynda Almatyda XVI Halyqaralyq Jáýtikov olimpiadasy ótti. Onyń qorytyndysy boiynsha Nur-Sultan qalasynyń oqýshylary 11 medaldy iemdendi, dep habarlaidy "Ult aqparat" elorda ákimdiginiń resmi saityna silteme jasap.
Halyqaralyq Jáýtikov olimpiadasy - Qazaqstan, Resei, Bolgariia, Rýmyniia, Grýziia jáne basqa elderden kelgen fizika-matematika baǵytyndaǵy mektep oqýshylarynyń bilimin baǵalaityn komandalyq jarys.
Olimpiadanyń ereksheligi – fizika, matematika, informatika pánderi boiynsha tapsyrmalardyń orys, qazaq jáne aǵylshyn tilderinde berilýinde. Árbir komanda quramy 3 matematik, 2 fizik, 2 informatikten turady.
Biyl dástúrli olimpiadaǵa álemniń 21 elinen 599 oqýshy qatysty. Olimpiada qorytyndysy boiynsha Nur-Sultan qalasynyń komandasy joǵary nátije kórsetti.
Altyn medaldi matematika páninen «NURORDA» litseiiniń 11-synyp oqýshysy Bibigúl Konkaeva jeńip aldy. Al daryndy balalarǵa arnalǵan «Bilim-innovatsiia litseiiniń» oqýshylary Danat Dúisembekov, Sam Fetýddah, Marlen Raýshanov, Beksultan Ábdikárimov kúmis medalge ie boldy.
Qola medaldi atalmysh oqý oryndarynyń oqýshylary Abylai Ashken, Nurlybek Taýbaqabyl, Amanbol Qanatuly, Jeńis Álibi, Eldar Qusdavletov, Asanáli Rahmetolla qanjyǵasyna bailady.
