Áleýmettik meditsinalyq saqtandyrý qorynyń sarapshylary monitoring barysynda mindetti áleýmettik meditsinalyq saqtandyrý (MÁMS) jáne tegin meditsinalyq kómektiń kepildendirilgen kólemi (TMKKK) qarajattaryn paidalanýda birqatar iri buzýshylyqtardy anyqtady, dep habarlaidy "Ult aqparat".
Meditsinalyq saqtandyrý qory baspasóz qyzmetiniń habarlaýynsha, emhana 16 myń azamatty ózine zańsyz tirkep, sol úshin 100 mln teńgeden astam paida tapqan.
Áleýmettik meditsinalyq saqtandyrý qory meditsinalyq kómektiń sapasy men kólemderine turaqty túrde monitoring júrgizip otyrady. Qor atalǵan jumysty júrgizý nátijesinde Astanadaǵy jekemenshik emhananyń 16 myń azamatty, onyń 13 myńnan astamy balany ózine zańsyz tirkegenin anyqtady. Azamattardy tirkeý Áleýmettik meditsinalyq saqtandyrý qorynan qarjylandyrýǵa qol jetkizý úshin osy atalǵan tulǵalardyń nemese olardyń zańdy ókilderiniń kelisiminsiz jasalǵan.
Munyń sebebi, barlyq emhanalarǵa tegin meditsinalyq kómektiń kepildik berilgen kóleminiń qarajatynan olarǵa bekitilgen árbir turǵyn úshin aiyna 1 617,64 teńge mólsherinde bazalyq tólem esepteledi. Bekitilgen halyqtyń jas koeffitsienti boiynsha soma árbir emhana boiynsha jeke retteledi. Nátijesinde atalǵan klinika memleketten árbir tirkelgen turǵyn úshin aiyna shamamen 1 800 teńge alyp otyrǵan.
Bul emhanaǵa shetelge turaqty nemese ýaqytsha turýǵa ketken adamdar tirkelgen. Sonymen qatar Qazaqstannyń basqa óńirlerinde turatyn azamattar da boldy. Turǵyndardyń elordalyq emhanaǵa eshqashan barmaǵany, alaida meditsinalyq qyzmet alǵandyǵy týraly 1414-ten habarlama alyp narazy bolǵandyǵy jóninde shaǵymdary bar.
Kepildik berilgen tólemnen bólek, emhana 16 myń azamat úshin naqty kórsetilmegen qyzmetterge MÁMS júiesinde tólem usynǵan. Sonymen birge Áleýmettik meditsinalyq saqtandyrý qory 5-10 jyl buryn qaitys bolǵandyǵy tirkelgen balalarǵa meditsinalyq qyzmet «kórsetý» faktisin anyqtady.
Nátijesinde elordalyq emhana jalpy somasy 100 mln teńgeden asatyn 33 myńnan astam qyzmetti «qosyp jazǵan».
Atalǵan fakti boiynsha materialdar quqyq qorǵaý organdaryna berildi. Qazirgi ýaqytta Astana qalasynyń mamandandyrylǵan ekonomikalyq sotynda Áleýmettik meditsinalyq saqtandyrý qory men elordalyq emhana arasynda buzýshylyq úshin aiyppuldy qosa zańsyz alynǵan somany qaitarý jóninde sot talqylaýy júrip jatyr.
