Búgin Nur-Sultanda azamattyq belsendiler turmystyq zorlyq-zombylyqqa qarsy mitingke shyqty. Beibit aktsiia «Jeruiyq» saiabaǵynda 250-ge jýyq adamnyń qatysýymen ótti, dep habarlaidy QazAqparat.
Sharaǵa qoǵamdyq birlestikter, tanymal qoǵam qairatkerleri men atalǵan máselege bei-jai qaramaityn azamattar qatysty.
Uiymdastyrýshylardyń aitýynsha, beibit mitingtin maqsaty qoǵamnyń nazaryn otbasy qundylyqtaryn saqtaýǵa, bir-birine syilastyqpen qarap, áielder men balalardyń quqyǵyn qorǵaýǵa arnalǵan.
«Ardager» qoǵamdyq birlestiginiń tóraiymy Baian Ahmetjanova áielder men balalar ózderin qaýipsiz sezinýi úshin qazaqstandyqtardy turmystyq zorlyq-zombylyqqa qarsy kúresýge shaqyrdy.
«Bul jerge kelýimizge qalada bolǵan qaiǵyly oqiǵa sebep boldy. 6 qazan kúni bolǵan otbasylyq urys-keris kezinde kúieýi áielin qala syrtyna aparyp, ústine benzin quiyp órtep jiberdi. Ol áiel moraldi túrde de, fizikalyq túrde de zardap shekti. Qazir zardap shekken áiel ólim men ómir ortasynda jatyr. Kóp áielder turmysyq zorlyq-zombylyq kórse qaida habarlasatynyn bilmeidi. Eger turmystyq zorlyq-zombylyq oryn alsa, dereý politsiiaǵa nemese qoǵamdyq uiymdarǵa habar berý kerek. Qalada ondai uiymdar jetkilikti. Eger sizderge sol uiymdardyń bailanys nómiri kerek bolsa, biz ony berýge daiynbyz», - dedi ol.
«Aýǵanstan soǵys ardagerleriniń keńesi» tóraǵasynyń orynbasary Miranbek Túlekbaev bireýdiń óz otbasynda zorlyq kórýine jol berip qoiyp, biz jas urpaqtyń bolashaǵyn bulyńǵyr etemiz dedi.
«Otbasydaǵy zorlyqqa jol berý - qoǵamnyń degradatsiiaǵa ushyraýyna jol berý degen sóz. Ózderińiz bilesizder, ár otbasy kishigirim sotsiým. Onda bolyp jatqan nárseler qoǵamda oryn alady», - dedi aýǵan soǵysynyń ardageri.
«Nur-Sultan qalasynyń Chernobl odaǵy» QB tóraǵasy Qýandyq Omarbaev sherýge qatysýshylardyń nazaryn qoǵamdaǵy ákeniń rólin kóterýge aýdardy.
«Er azamat otbasynyń kóz aldynda, ásirese balalary úshin úlgi bolyp sanalady. Ókinishke qarai, bul qazir protsess keri ketti. Er azamattar óz boiyndaǵy jaqsy qasietterin kórsete bermeidi. Sondyqtan, barlyq azamattarǵa qaratyp aitamyn, otbasy degenimiz – januia. Januia degen mahabbat pen bir-birine degen syilastyq bolýy tiis uia. Er azamat – ol qorǵan. Otbasyndaǵy barlyq áielder súiikti ári qadirli bolsa eken deimin. Al áielge qol kóteretin ol erkek emes. Sebebi, er azamat ol myqty ári sypaiy bolýy kerek», - dedi Q.Omarbekov.
Zańger Áigerim Qaldyǵulova turmystyq zorlyq-zombylyqqa tap bolǵan áielderge quqyqtyq jáne konsýltatsiialyq kómek kórsetti.
Onyń aitýynsha, kóptegen erler ajyrasqan soń jumys istep, alaida aliment tólemes úshin tabysyn jasyrady. Zańger osy oraida barlyq áielderdi zań jaǵynan saýatty bolyp, aliment tólettirip, óz quqyqtaryn qorǵaýǵa shaqyrdy.
Otbasy qundylyqtaryn saqtaý týraly «BALAUSA CLUB» QB jetekshisi Kilara Aldanysh ta kóterdi.
«Men kópbalaly anamyn, tórt bala tárbielep otyrmyn. Otbasy qundylyǵy men dástúrleriniń aiaqasty bolǵanyn kórý óte aýyr. Bńz balalardyń tárbiesine jaýaptymyz. Ol bizdiń elimizdiń bolashaǵyna bailanysty. Eger balalar otbasynda zorlyq-zmbylyq kórmese, keiin óziniń otbasynda da oǵan jol bermeidi. «Ne ekseń, sony orasyń» degen halyq danalyǵy tegin aitylmaǵan», - dedi K.Aldanysh.
Miting kezinde «Ońaltý tehnologiialary jáne kontseptsiialary» QQ-nyń direktory Orynbasar Quljabaeva, quqyq qorǵaýshy Qabi Rýstam jáne taǵy basqalary qatysty.
Qatysýshylar Qazaqstan turǵyndaryn otbasy qundylyqtaryn saqtaýǵa jáne áielder, qarttar men balalarǵa qatysty jasalǵan zombylyq faktilerin obektivti tergeýdi qamtamasyz etýge shaqyrdy. Beibit mitingke qatysqandardyń barlyǵy qoǵamda turmystyq zorlyq-zombylyqqa jol berýge jol berýge bolmaitynyn aityp, oǵan qarsy kúreske birigýge shaqyrdy.
Eske sala keteiik, áleýmettik jelilerde elorda turǵyny Anar Bitebaeva óz paraqshasynda qalalyq ákimdik 19 qazanda saǵat 10.00-11.30 aralyǵynda Jeruiyq saiabaǵynyń soltústik-batys bóliginde beibit miting ótkizýge ruqsat bergenin habarlaǵan bolatyn.
