Elordada kúres túrlerinen ótetin álem chempionatyna bes qurlyqtan 60-tan astam Olimpiada chempiony men júldegeri keledi, dep habarlaidy QazAqparat.
Bul týraly QR grek-rim kúresiniń vitse-prezidenti Dáýlet Turlyhanov «Barys-Arena» stadionynda ótken baspasóz máslihatynda aitty.
«Chempionatta 1002 balýan baq synaidy. Olar 104 eldiń namysyn qorǵaidy. Ol týraly aqparat taratýǵa 250-den astam jýrnalist tirkeldi. Óitkeni elorda tórine bes qurlyqtan 60-tan astam Olimpiada chempiony men júldegeri kele jatyr. Onyń ishinde qonaq retinde tamashalaityn ardagerler de, medalǵa talasatyn balýandar da bar. Atap aitsaq, qazaqstandyqtarǵa etene tanys bolyp ketken Aleksandr Karelin, jas amerikalyq juldyz Kail Snaider, tórt dúrkin álem chempiony, Olimpiada chempiony Djordan Barroýz, japoniialyq áigili chempion Kaori Itio, Artýr Aleksanian, Lopes Nýnes, Qazaqstannyń týmasy Valerii Riazantsev, Belarýs sportshysy Kamandar Madjidov, Irannan áigili Rasý Hadem keledi», - dedi Dáýlet Turlyhanov.
Onyń aitýynsha, bul jolǵy chempionat grek-rim sheberleri úshin naǵyz synalatyn sát bolmaq.
«Grek-rim kúresinen álem chemiponatynyń «altynyn» almaǵanymyzǵa 20 jyl bolypty. Óz kilemizde sol olqylyqtyń orny tolýy tiis. Sońǵy kezde álem chemiponaty men Olimpiada oiyndarynda boks pen aýyr atletikadan abyroiymyz biiktep júr ǵoi. Solardyń sapyna balýandarymyz da enýi kerek. Boksshylarymyzdyń jeńisti jolyn balýandar jalǵastyrýy kerek», - dedi federatsiia ókili.
