Elordadan Túrkistan oblysy Maqtaaral aýdanyna gýmanitarlyq júk jóneltildi, - dep habarlaidy QazAqparat.
Atap aitqanda, búgin tańerteń Nur-Sultan qalasynan Maqtaaral aýdanyna turǵyndarǵa qajetti zattar tielgen tórt júk kóligi jolǵa shyqty.
«Maqtaaral turǵyndary úshin qalada arnaiy gýmanitarlyq kómek daiyndaldy. Osy tórt júk kóliginde 40 tonna taýar tieldi. Onyń 20 tonnasy azyq-túlik ónimderi. Sonymen qatar, gigienalyq zattar da jóneltiledi», - dedi elorda ákimdiginiń ókili Nurlan Sydyqov.
Munymen qosa, qala ákimdigi arnaiy nasostyq stansany, qurylys zattaryn, jazǵy shatyrshalardy, 100-den astam kerýetti, ydys-aiaq, sondai-aq qutqarýshylarǵa arnalǵan kiimderdi jetkizetin bolady.
Osy oraida júrgizýshiler men elorda ákimdigi ókilderi 1,8 myń shaqyrym joldy eńserýi kerek.
«Jolda shamamen bir jarym táýlik júremiz. Júk Maqtaaral aýdanyna deiin jetkizilip, sol jerde eldi mekenderge úlestiriledi», - dedi N. Sydyqov.
Aita keteiik, azyq-túlik ónimderi kásipkerlerdiń qarjysyna, al arnaiy jabdyqtar men kiimder TJ departamentimen birlese ákimdik daiyndady.
Eske salaiyq, Ózbekstanda bógettiń jarylýynan Túrkistan oblysynyń birneshe eldi mekenin sý basty. 31 myńnan astam turǵyn evakýatsiialandy. Atqarylǵan jumystardan keiin sý basý qaýpi seiilgen Myrzakent, Aqjol aýyldarynyń 17 myńnan astam turǵyny úilerine qaita bastady.
Daqynda Túrkistan oblysynyń ákimi Ómirzaq Shókeev Úkimet otyrysynda tótenshe jaǵdai saldarynan aldyn ala málimet boiynsha, 845 turǵyn úidi, 3 mektepti, 5 balabaqshany, 4 meditsina nysanyn, 1 mádenietin úiin, sonymen qatar 10 dúkendi sý basqanyn málim etti.
Jeńis aýylyndaǵy kópirdi jáne respýblikalyq, oblystyq, aýdandyq mańyzy bar 54,7 shaqyrym avtomobil joly sý astynda qaldy. Munan bólek, aldyn ala jinaqtalǵan málimetterge sáikes, kólemi 7 639 gektar egistik jerin sý shaidy. Mal shyǵyny da naqtylanyp jatyr.
Prezident Qasym-Jomart Toqaev Maqtaaraldaǵy sý tasqynynan zardap shekkenderge kómek kórsetýdi tapsyrdy.
