Nur-Sultan qalasyndaǵy «Jekpe-jek» saraiyna Olimpiada chempiony Jaqsylyq Úshkempirovtiń esimi berilmek. Úkimettiń tiisti Qaýly jobasy «Ashyq úkimet» portalynda qoǵam talqylaýyna usynyldy, dep habarlaidy "Ult aqparat".
«Qazaqstan Respýblikasynyń ákimshilik-aýmaqtyq qurylysy týraly» 1993 jylǵy 8 jeltoqsandaǵy Qazaqstan Respýblikasy Zańynyń 10-babynyń 4-1) tarmaqshasyna jáne «Qazaqstan Respýblikasynyń aýmaǵyndaǵy áýejailarǵa, porttarǵa, temirjol vokzaldaryna, temirjol stansalaryna, metropoliten stansalaryna, avtovokzaldarǵa, avtostansalarǵa, fizikalyq-geografiialyq jáne memleket menshigindegi basqa da obektilerge ataý berý, sondai-aq olardy qaita ataý, olardyń ataýlarynyń transkriptsiiasyn naqtylaý men ózgertý jáne memlekettik zańdy tulǵalarǵa, memleket qatysatyn zańdy tulǵalarǵa jeke adamdardyń esimin berý qaǵidalaryn bekitý týraly» Qazaqstan Respýblikasy Úkimetiniń 1996 jylǵy 5 naýryzdaǵy № 281 qaýlysyna (Qazaqstan Respýblikasynyń PÚAJ-y, 1996 j., № 11, 81-qujat) sáikes, Qazaqstan Respýblikasynyń Úkimeti Qaýly etedi:
Nur-Sultan qalasyndaǵy «Jekpe-jek» saraiyna «Qazaqtan shyqqan tuńǵysh Olimpiada jáne Álem chempiony, «Qazaqstannyń Eńbek Eri» Jaqsylyq Úshkempirov atyndaǵy Jekpe-jek saraiy» ataýy berilsin», - delingen qujat mátininde.
Qaýly jobasy qoǵam talqysyna 7 qyrkúiek kúni berilip, 21 qyrkúiekke deiin jalǵasady. Kez kelgen azamat «Ashyq úkimet» portalynda óz pikirin qaldyra alady.
Eske salaiyq, grek-rim kúresinen tuńǵysh Olimpiada chempiony, Álem chempiony, Qazaqstannyń eńbek eri, «Barys», «Qurmet» «Parasat» ordenderiniń iegeri Jaqsylyq Ámiráliuly Úshkempirov 1951 jyly 6 mamyrda Qazaq KSR, Jambyl oblysy, Sverdlovsk aýdany, Chapaev keńsharynda dúniege kelgen.
