Elordamyzda ashylǵan Memlekettik mýzykalyq balalar men jasóspirimder teatryna direktor bolyp Ashat Maemirov taǵaiyndaldy.
Bul týraly teatrdyń baspasóz qyzmetinen málim boldy, dep habarlaidy "Ult aqparat".
Ashat Maksimuly Maemirov - elimizge tanymal teatr rejisseri, Qazaqstannyń eńbek sińirgen qairatkeri, Ónertaný PhD doktory, professor, «Bolashaq» halyqaralyq stipendiiasynyń túlegi.
A.S.Pýshkin atyndaǵy Oral pedagogikalyq institýtynyń filologiia fakýltetin jáne T.Júrgenov atyndaǵy Qazaq ulttyq óner akademiiasyn «teatr rejisseri» mamandyǵy boiynsha úzdik aiaqtaǵan.
2008 jyly «Bolashaq» halyqaralyq stiipendiiasymen Sorbonna ýniversitetinde jáne Parij ulttyq óner konservatoriiasynda bilimin jetildirdi. 2010 jyly Resei teatr óneri akademiiasynyń (GITIS) magistratýrasyn támamdady.
2016 jyly T.Júrgenov atyndaǵy Qazaq Ulttyq óner akademiiasynyń ǵylymi keńesinde «Qazaqstannyń teatr rejissýrasyndaǵy sabaqtastyq pen jańashyldyq» taqyrybynda doktorlyq dissertatsiiasyn qorǵap, ónertaný boiynsha «Filosofiia doktory» ǵylymi dárejesine ie boldy.
Eńbek jolyn 1997 jyly Batys Qazaqstan oblystyq qazaq drama teatrynda qoiýshy-rejisser bolyp bastady. Ár jyldary «Qazaqstannyń rýhani damý qory» AQ vitse-prezidenti, QR Mádeniet jáne sport ministrliginiń janyndaǵy «Qazaq áýenderi» AQ prezidenti bolyp qyzmet etti.
Elimizde tuńǵysh ret ashylǵan «Astana Musical» memlekettik teatryna kórkemdik jetekshilik jasady. «Qazaqkontsert» memlekettik kontserttik uiymynyń bas direktory, M.Áýezov atyndaǵy Qazaq memlekettik akademiialyq drama teatrynyń direktory qyzmetterin atqardy.
A.Maemirov 2018-2019 jyldary T.Júrgenov atyndaǵy Qazaq ulttyq óner akademiiasynyń rektory boldy. Osy ýaqytqa deiin Q.Qýanyshbaev atyndaǵy Qazaq memlekettik akademiialyq mýzykalyq drama teatrynyń direktory bolyp eńbek etti.
Ashat Maemirov memlekettik jáne halyqaralyq aýqymdaǵy seksennen astam mádeni is-sharalardyń rejisseri boldy. Qazaqstannyń teatr sahnalarynda jiyrmadan astam qoiylymdardy sahnalap, respýblikalyq jáne halyqaralyq óner festivalderiniń birneshe márte laýreaty atandy.
