Prezidenttiń kómekshisi Máýlen Áshimbaev Nur-Sultanda salynyp jatqan Qazaq drama teatry ǵimaratynyń qurylysymen tanysty, dep habarlaidy QazAqparat.
Elorda úshin mańyzdy mádeni nysan Qazaqstannyń Tuńǵysh Prezidenti Nursultan Nazarbaevtyń tapsyrmasy boiynsha boi kóterýde. Qazaq drama teatrynyń eskizdik jobasyn Elbasy maquldap, qurylys barysyn Memleket basshysy Qasym-Jomart Toqaevtyń ózi baqylap otyr.
«Qazaq memlekettik akademiialyq-mýzykalyq drama teatrynyń ǵimaraty Elbasynyń tapsyrmasymen salynyp jatyr. Nursultan Nazarbaevtyń ózi nysannyń jobasyn qarap, memlekettik organdarǵa tapsyrma bergen bolatyn. Minekei, búgin kórip otyranymyzdai, nysan qurylysynyń qarqyndy júrgizilip jatqanyna kózimiz jetti. Osy qurylys kelesi jyly 6 shildege deiin aiaqtalady degen qurylysshylardyń ýádesi bar», - dedi Máýlen Áshimbaev búgin qurylys basynda.
Onyń aitýynsha, Qazaqstanda qazirgi tańda óner infraqurylymy barynsha damyp kele jatyr.
«Elordada Elbasynyń tikelei tapsyrmasymen «Astana-Opera», «Astana-Balet» teatrlary, «Shabyt» ǵimaraty salynǵany belgili. Bul teatrlar búkil Qazaqstannyń maqtanyshyna ainaldy. Buny – Elbasy men Memleket basshysynyń ónerge degen qamqorlyǵynyń nyshany dep qabyldaý kerek. Jalpy, teatr degen – jastardy tárbieleý, olarǵa durys qundylyqtardy sińirý, qoǵamdy estetikalyq turǵyda damytý jaǵynan óte joǵary mańyzǵa ie. Sondyqtan, Qazaqstannyń teatrlaryn ary qarai qoldaý máselesi memlekettiń baqylaýynda bolady. Kelesi jyly 6 shildede teatr ujymy óziniń qonys toiyn toilaidy dep senemiz», - dedi Máýlen Áshimbaev.
«Samuryq-Qazyna» ulttyq ál-aýqat qorynyń qoldaýynyń arqasynda qazirgi tańda nysannyń alǵashqy qabatynyń qurylysy aiaqtalýǵa jaqyn. Barlyq jumystardy 2020 jyly aiaqtaý josparlanyp otyr.
Qazaq drama teatrynyń ǵimaraty Jumeken Nájimedenov pen Ahmet Baitursynov, 23-15 kósheleriniń qiylysynda ornalasqan. Nysan 3 qabatty bolady. 640 jáne 202 adam siiatyn eki zaly bar. Nysannyń jalpy aýmaǵy 19754 sharshy metrdi quraidy.
