Nur-Sultanda ziialy qaýym ókilderi Abai eskertkishine gúl shoqtaryn qoidy, dep habarlady elorda ákimdiginiń resmi saity.
Saltanatty jiynǵa memleket jáne qoǵam qairatkerleri, ziialy qaýym, qalalyq ardagerler keńesiniń ókilderi, ǵalymdar, maslihat depýtattary, Nur-Sultan qalasy ákiminiń orynbasary Eset Baiken qatysty.
«Abaidyń sózi – myńjyldyqtardyń enshisi. Sondyqtan «Jańa Qazaqstandy» órkendetý úshin Abaidyń danalyq ǵibrattaryn isimizde, qareketimizde, oiymyzda qoldanýymyz kerek. Bastysy, Abaidyń ǵibrattaryn, kemeńgerlik keńesterin ómirimizde laiyqty paidalanýymyz qajet. Sol kezde ǵana biz rýhani jetilemiz jáne «Jańa Qazaqstandy» damytamyz. Abai – adamzattyń sózin sóilegen adam. Ol adamzat oishyldarynyń qatarynda turǵan adam. Ol – Pýshkin men Lermontovty sóiletken adam. Abaidyń joly – «Jańa Qazaqstannyń» jarqyn joly dep esepteýimiz kerek», – dedi ǵalym Serik Negimov.
Jinalǵan qaýym ult perzentine taǵzym jasap, gúl shoqtaryn qoidy.
«Jyl saiyn 10 tamyz kúni dástúr boiynsha Abaidyń eskertkishine gúl shoǵyn qoiý rásimi bolady. Keiin elordada aýqymdy is-sharalar bastalady. Máselen, mektepter men JOO-larda tanymdyq is-sharalar ótkiziledi. Sonymen qatar, biyldan bastap iri-iri saýda ortalyqtarynda Abaidyń óleńderi men qara sózderiniń aýdio nusqasy jariialanyp turady. Bul kúndelikti 15-20 ret shyǵyp turady», – dedi Nur-Sultan qalasynyń ákimdigi Tilderdi damytý jáne arhiv isi basqarmasynyń basshysy Sáken Esirkep.
Aita keteiik, 2020 jyly Úkimet qaýlysymen 10 tamyz – Abai kúni dep belgilengen bolatyn.
