Elordada 21 sáýirde jylytý maýsymy aiaqtalady. Bul týraly Nur-Sultan qalasynyń Otyn-energetika kesheni jáne kommýnaldyq sharýashylyq basqarmasynyń basshysy Ernat Bázil málim etti, - dep habarlaidy QazAqparat.
«Máslihatynyń 2014 jylǵy 27 maýsymdaǵy № 249/36-V sheshimimen bekitilgen, Nur-Sultan qalasynda jylytý maýsymyna daiyndyq jáne ony ótkizý erejelerine sáikes, aýanyń ortasha temperatýrasy bes táýlik boiy 10°C jáne odan joǵary bolsa, jylytý maýsymyn aiaqtaý týraly sheshim qabyldanady... Nur – Sultan qalasynda jylytý maýsymy 2019 jyldyń 30 qyrkúieginde bastalyp, 2020 jyldyń 21 sáýirine deiin sozylady, ol (205) kúndi qurady, iaǵni jylytý maýsymyn aiaqtaý erteńge josparlanǵan», - dedi N. Bázil onlain brifing barysynda.
Onyń sózine qaraǵanda, esepti kezeńde energiia kózderinde, jylý jáne elektr jelilerinde júieni apattyq ajyratý men birinshi dárejeli isten shyǵý sekildi jaǵdailar tirkelgen joq.
«Astana-Energiia» AQ boiynsha jylytý maýsymy kezeńinde 2 234 mln kVt saǵat elektr energiiasy jáne 6 122 myń Gkal jylý energiiasy óndirildi. Qalanyń energiia kózderinde 2 767 myń tonna kómir (37 437 vagon), 5 226 myń tonna mazýt (87 tsisterna) jumsaldy», - dedi basqarma basshysy.
Onyń sózine qaraǵanda, «Astana-ÓEK» AQ boiynsha jylý berý maýsymynda elektr energiiasyn jeliler arqyly tasymaldaý kólemi 2 163 mln kVt saǵatty qurady, bul ótken jylmen salystyrǵanda 1 paiyzǵa az (2 184 mln kVt saǵat).
«Ótken jylytý maýsymynda «Astana-Teplotranzit» AQ 5 527 myń Gkal kóleminde jylý energiiasyn berýdi jáne taratýdy qamtamasyz etti, bul ótken jylmen salystyrǵanda 2,6 paiyzǵa az (5 671 myń Gkal)», - dedi Ernat Bázil.
