Elordada jumyssyz qalǵan azamattarǵa tólem berý bastaldy. Bul týraly Ortalyq kommýnikatsiialar qyzmetindegi brifingte Nur-Sultan qalasy ákiminiń orynbasary Baqtiiar Máken aitty, dep habarlaidy QazAqparat.
«Elbasy, «Nur Otan» partiiasynyń Tóraǵasy Nursultan Nazarbaevtyń tapsyrmasyn qoldaý maqsatynda qalalyq eriktiler partiianyń volonterlerimen birlesip, «Birgemiz» aktsiiasynyń aiasynda 5 myńnan astam otbasyǵa tiisti áleýmettik kómek kórsetýi jalǵasýda. Sonyń ishinde 3,5 myń otbasyǵa, atap aitqanda jalǵyz turatyn zeinetkerlerge, múmkindigi shekteýli azamattarǵa, halyqtyń áleýmettik jaǵynan osal toptarynyń ókilderine ataýly kómek kórsetilýde«,- dedi Baqtiiar Máken.
Qala ákiminiń aitýynsha, munan bólek, 25 naýryzdan beri elorda volonterleri meditsinalyq qyzmetkerlermen birlesip, dispanserlik esepte turǵan egde jastaǵy azamattardyń úilerine dári-dármekterdi jetkizýde. Karantin kezeńinde «Qazposhtanyń» qyzmetkerleri eriktilermen birlesip, zeinetaqyny aqshalai alatyn azamattarǵa ony úilerine jetkizip beredi.
«Memleket basshysy jumyssyzdyqty sheshý maqsatynda tiisti máselelerge toqtalyp, tapsyrma bergen bolatyn. Soǵan bailanysty qalamyzda tiisti jumystar bastalyp ketti. Jumyssyz qalǵan azamattarǵa búginnen bastap jumys ortalyqtar arqyly onlain negizde tólem berý bastalady. 300 ótinish túsken bolatyn. Solardyń bári búginnen bastap alady. Onyń kólemi 42 500 teńge kóleminde bekitilgen. Memleket degenimiz siz ben biz. Biz bir birimizdi qiyn-qystaý kezeńde eshqashan umyt qaldyrmaimyz. Áleýmettik az qamtylǵan otbasylar men muqtaj azamattarǵa azyq-túlik, dári-dármek ýaqtyly jetkizilip jatyr. Bul – aýyrtpalyq kezeńi. Bir-birimizdi synaityn emes, birligimiz synalatyn kez. Sondyqtan, tártip saqtap, kúndiz-túni uiqy kórmei aýyrǵan azamattardy emdep júrgen meditsina qyzmetkerlerine úide otyryp kómekteseiik», - dedi elorda ákiminiń orynbasary.
