Nur-Sultan qalasynda joldy kesip ótken áieldi qoǵamdyq kólik qaǵyp ketti, dep habarlaidy QazAqparat CTS jaýapkershiligi shekteýli seriktestiginiń baspasóz qyzmetine silteme jasap.
«№40 avtobýs júrgizýshisi joldy jaiaý júrginshige arnalǵan belgi joq jerden kesip ótken áieldi qaǵyp ketti. Júrgizýshiniń aitýynsha, ol aialdamadan endi ǵana qozǵalǵan. Jol taiǵanaq bolǵandyqtan áiel tepe-teńdikti saqtai almai qulaǵan. Degenmen avtobýs júrgizýshisi der kezinde toqtap, jedel járdem shaqyrǵan», - dedi atalǵan mekemeniń qoǵammen bailanys bóliminiń jetekshisi Naýat Azanbaeva.
Onyń aitýynsha, oqiǵa ornyna politsiia qyzmeti shaqyrylyp, qoǵamdyq kólik júrgizýshisinen túsinik alyndy.
Odan ári istiń anyq-qanyǵyna jetý úshin material tekserýge jiberildi.
Atalǵan jol-kólik oqiǵasyna qatysty politsiia departamenti de túsinik berdi.
«3 aqpan kúni saǵat 11:40-ta Táýelsizdik dańǵyly boiyndaǵy aialdamadan júre bastaǵan avtobýs júrgizýshisi joldy belgi joq jerden kesip ótken áieldi qaǵyp ketti. Dene jaraqatyn alǵan zardap shegýshi aýrýhanaǵa jetkizilip, dárigerlerdiń qaraýynan soń úiine jiberildi. Oqys oqiǵaǵa qatysty anyqtaý sharasy júrip jatyr», - delingen aqparatta.
Osy oraida qalalyq politsiia departamenti jaiaý júrginshilerdi jol erejesin buzbaýǵa jáne saq bolýǵa shaqyrady.
