Elordada vaktsina almaǵandar arasynda KVI-men aýyrǵandar úlesi óte joǵary. Bul týraly Nur-Sultan qalasynyń bas memlekettik sanitar dárigeri Sarhat Beisenova aitty, dep habarlaidy QazAqparat.
«Ádettegidei, COVID-19-ǵa barlyq jastaǵy adamdar, ásirese qarttar beiim keledi. Qalada eresek adamdar arasynda aýrýǵa shaldyqqandar úlesi 79,7 paiyzdy quraidy», - dedi ol qala ákimdiginde ótken baspasóz máslihatynda.
Onyń atap ótýinshe, elordada koornavirýspen aýyrǵandardyń 27,8 paiyzy - 40-59 jas, 20,3 paiyzy - 30-39 jas jáne 20,1 paiyzy - 18-29 jas aralyǵyndaǵy adamdar. Sonymen qatar aýyrǵandardyń 11,5 paiyzynyń jasy 60-tan asyp ketken. Al 14 jasqa deiingi koronavirýspen aýyrǵan balalardyń úlesi 22,9 paiyzdy qurap otyr.
«Osy jyldyń 1 aqpanynan halyqty koronavirýs infektsiiasyna qarsy vaktsinatsiialaý júrgizilip jatqanyna qaramastan ekpe almaǵandar arasyndaǵy aýrýshańdyq óte joǵary jáne barlyq aýyrǵandardyń 97,1 paiyzyn quraidy. Al eger 1 jeltoqsannan bastap saraptaityn bolsaq, osy kezeńde aýyrǵandardyń 84,7 paiyzy nemese aýyrǵan 2 313 adamnyń 1 959-y ekpe almaǵan. Vanktsina alǵandar arasyndaǵy aýrýshańdyq úlesiniń óte tómendigi vaktsinatsiia tiimdiligin taǵy bir márte dáleldeidi», - dedi Sarhat Beisenova.
