7 shildede Nur-Sultan qalasynda Ulttyq Dombyra kúnine arnalǵan merekelik kontsert ótedi. Osyǵan orai «Qazaq Eli» monýmentiniń aldyndaǵy alań byltyrǵydai úlken sahnaǵa ainalady, dep habarlaidy "Ult aqparat" Nur-Sultan qalasynyń Mádeniet jáne sport basqarmasyna silteme jasap.
Sharaǵa jas ereksheligine qaramastan niet bildirgenderdiń barlyǵy qatysa alady. Olar «Saryarqa», «Adai», «Álqissa», «Kóńil tolqyny», «Balbyraýyn» jáne «Kóreǵuly» kúilerin jatqa bilýge tiis. Sharaǵa qatysý úshin 1 maýsymnan 5 shildege deiin www.asyldombyra.kz saitynda onlain tirkelý kerek. Kontsert saǵat 12:00-de bastalady.
«Biyl Ulttyq Dombyra kúnine orailastyrylǵan jappai kontsertte oryndalatyn alty kúi tańdaldy. Árine, qatysýshylardyń olardyń barlyǵyn bilgeni jaqsy. Degenmen usynylǵan kompozitsiialardyń bireýin ǵana biletinder de kontsertke úles qosa alady», - dep habarlady Nur-Sultan qalasynyń Mádeniet jáne sport basqarmasynan.
7 shildede mereke barysynda kúmbirlegen kúiden basqa, jinalǵandar nazaryna «Jastar» teatrynyń akterleri tarihi qoiylymyn usynady, elordalyq mýzyka mektepteriniń shákirtteri óz ónerlerin ortaǵa salady, aqyndar aitysy ótedi. Sýyryp salma óleńge ysylǵan jandar ulttyq mýzykalyq aspabymyz – dombyrany jyrǵa qosady. Sonymen qatar, «Qazaq Eli» monýmentiniń aldyndaǵy alańda kiiz úiler tigilip, qazaq aýyly ornalasady tebedi. Kelýshiler dombyranyń jáne basqa da ulttyq aspaptardyń túr-túrimen tanysa alady.
Sonymen qatar, mereke keshke Esil ózeniniń jaǵasyndaǵy Amfiteatrda «Naǵyz qazaq - dombyra» kontsertimen jalǵasyn tabady. Sahna tórinde Qazaq orkestri, Nur-Sultan qalasy ákimdiginiń Memlekettik akademiialyq filarmoniiasynyń solisteri men vokalisteri óner kórsetedi. Kontserttiń bastalýy saǵat 17.00-de. Kirý - tegin.
Eske salaiyq, ótken jyly Ulttyq Dombyra kúnine orai «Qazaq Eli» monýmentiniń aldyndaǵy alańda dombyranyń qulaǵynda oinaityn 2 myńnan asa ónerpazdan qurylǵan orkestr óz ónerin ortaǵa saldy. Fleshmobqa qatysý úshin elimizdiń óńirlerinen de dombyrashylar elordaǵa at basyn tiredi. Sharany Elbasy Nursultan Nazarbaev tamashalady. Aita keteiik, bul qala tarihyndaǵy aitýly oqiǵa boldy. «Kóńil ashar», «Adai», «Balbyraýyn», «Erke Sylqym» jáne «Saryarqa» kúilerin oryndaǵan dombyrashylarǵa QR eńbek sińirgen qairatkeri, kompozitor Aitqali Jaiymov dirijerlik etti. 1 shildede ótken Ulttyq Dombyra kúnine arnalǵan kontsertke belgili mýzykanttar, qoǵam jáne memleket qairatkerleri, onyń ishinde QR Parlamenti Májilisiniń depýtaty Bekbolat Tileýhan, Nur-Sultan qalasynyń mádeniet jáne sport basqarmasynyń basshysy Bolat Majaǵulov, Qazaqstannyń eńbek sińirgen artisi Aigúl Úlkenbaeva, Nurken Áshirov, dirijer Arman Júldebaev, «Bastaý» toby, «Serper», «Asyl toby», «Mýzart», Asylbek Eńsepov jáne basqalary qatysty. Aita keteiik, byltyr qatysýshynyń eń kishkentaiy 7 jasta, al eń úlkeni – 75-te boldy. Shara barysynda eń jas qatysýshyǵa Elbasy óz qolymen dombyra tartý etti.
Ulttyq dombyra kúni 2018 jyly Qazaqstan Respýblikasynyń Tuńǵysh Prezidentiniń Jarlyǵymen bekitildi jáne jyl saiyn shildeniń birinshi jeksenbisinde atalyp ótiledi.
