Senat Tóraǵasy Máýlen Áshimbaev pen Qazaqstanǵa resmi saparmen kelgen Tájikstan Oli Majlisi Milli Majlisiniń tóraǵasy Rýstami Emomali aqyn, tájik jáne parsy klassikalyq ádebietiniń negizin qalaýshy Ábý Abdallah Rýdakidiń eskertkishin ashý rásimine qatysty, dep habarlaidy QazAqparat.
Eskertkishtiń ashylý saltanatynda sóz sóilegen Máýlen Áshimbaev bul shara Qazaqstan astanasynyń mádeni ómirindegi mańyzdy oqiǵa bolyp otyrǵanyn jáne Qazaqstan-tájik yntymaqtastyǵynyń damý tarihyna enetinin atap ótti.
«Qazaqstanda uly aqyn Ábý Abdalla Rýdakidiń shyǵarmashylyq murasyn joǵary baǵalaidy. Onyń poeziiasy álemdik mádeniettiń qazynasyna endi. Omar Haiiam, Nizami, Firdoýsi, Djámi jáne Rými siiaqty Shyǵystyń kórnekti aqyndary men jazýshylary Rýdakidiń shyǵarmashylyǵynnan ósip shyqty. Búgin biz onyń aty berilgen kóshede tájik jáne parsy klassikalyq ádebietiniń negizin qalaýshy Abý Abdallah Rýdakige eskertkish ashamyz. Dýshanbede qazaqtyń uly oishyly Abai atyndaǵy kóshe bar ekenin bilemiz. Ekijaqty qarym-qatynastarda mádeni-rýhani bailanystar árdaiym berik kópir jáne irgetas bolyp qala beredi. Kórnekti tulǵalarymyzdyń estelikterin qurmetteý bizdi qýantady», - dedi Senat Tóraǵasy.
Senat baspasóz qyzmetiniń málimetinshe, osy kúni eki el parlamentteri palatalarynyń tóraǵalary Qazaqstan Respýblikasyndaǵy Tájikstan Respýblikasynyń jańa Elshiliginiń qurylys ornyna alǵashqy tas qalaýdyń saltanatty rásimine qatysty.
