Elordada Táshenovke, Qojanovqa, Bigeldinovke, Altynsarinǵa eskertkish ornatylady.
Bul týraly búgin elorda ákimdiginde ótken keńeitilgen keńeste Nur-Sultan qalalyq mádeniet basqarmasynyń bastyǵy Nurlan Sydyqov aitty, dep habarlaidy QazAqparat.
Onyń aitýynsha, álemniń ekinshi ustazy atanǵan Ál-Farabidiń 1150 jyldyq mereitoiyn atap ótý úshin arnaiy qalalyq is-sharalar jospary bekitilgen. Elordada halyqaralyq ǵylymi-tájiribelik konferentsiia josparlanǵan. Sondai-aq jas ǵalymdardyń qatysýymen Farabi oqýlary, Farabitanýshylar kezdesýleri, kitap kórmeleri, shyǵarmashylyq keshter uiymdarylady. Elordadaǵy Oqýshylar saraiyna Ál-Farabi esimin berý máselesi de sheshilip jatyr.
«Sonymen qatar osy jyly qańtardyń 10-nan bastap sońyna deiin qalamyzǵa Ál-Farabi eskertkishin ornatýǵa konkýrs jariialandy. Buiyrtsa, eskertkishti biyl ornatamyz degen oiymyz bar. Osy múmkindiktik paidalanyp aita ketý kerek, Ál-Farabimen qatar birqatar tulǵaǵa eskertkish ornatý josparda bar. Atap aitqanda, Jumabek Táshenov, Sultanbek Qojanov, Talǵat Bigeldinov, Ybyrai Altynsarinniń eskertkishine konkýrs jariialandy. Aqpan aiynda konkýrs qorytyndysy shyǵady jáne eń úzdik jumystar respýblikalyq memlekettik komissiiaǵa usynylady», - dedi Nurlan Sydyqov.
Basqarma basshysynyń aitýynsha, munan bólek, biyl elordada Abai ortalyǵy salynady. Ortalyq salynatyn oryn anyqtalǵan. Naqty aitqanda Qazaqstannyń Ulttyq mýzeii janynan boi kóteredi.
«Munan bólek, qalamyzda 6 teatr bar. Osy teatrlardyń barlyǵynda Abaiǵa, Ál-Farabige qatysty qoiylymdar qoiylady. Qazir biz Abaidyń tek bir beinesi sahnalanatyn qoiylymdy tamashalap júrmiz. Osy jyly múmkindik bolsa, sol Abaidyń jas kezinen, Abaidy basqa qyrynan tanytatyn qoiylymdar daiyndap jatyrmyz», - dedi ol.
