Elordada taǵy bir Arbat salynady. Jańa qoǵamdyq keńistik Respýblika dańǵylynan Qýanyshbaev atyndaǵy Qazaq drama teatryna deiin Omarov kóshesiniń boiynda ornalasqan, dep habarlaidy "Ult aqparat" qala ákimdigine silteme jasap.
«Elordada taǵy bir Arbat salynady. Jaiaý júrginshiler promenady qurylysy boiynsha jumys júrgizip jatyrmyz. Jańa qoǵamdyq keńistik Respýblika dańǵylynan Q.Qýanyshbaev atyndaǵy Qazdramteatrge deiin Omarov kóshesiniń boiynda ornalasady. Jaiaý júrginshiler promenady eki teatr arasyndaǵy aýmaqty bailanystyrady. Respýblika dańǵyly jaǵyndaǵy fontan qaita jóndeledi. Ol jylǵaǵa qarai aǵady. Al sol jylǵa boiynda balalarǵa arnalǵan sýmen oinaityn elementter ornatamyz», dep jazdy qala ákimi Altai Kólginov Instagram-daǵy paraqshasynda.
Buǵan qosa Arbat aýmaǵynda aspaly átkenshek ornatylady. Balalar úshin jeke sport jáne oiyn alańdary, tynysh aýmaq, kovorking ortalyq syndy tegin seminar men til sabaǵyn ótkizýge arnalǵan jeke zonalar jasalady.
«Kópir asty keńistigi aýmaǵynda (Saraishyq dańǵyly) balalarǵa arnalǵan ekoalań men aspaly saiabaq jasamaqshymyz. Bul ideiany da osy jerde iske asyramyz. Beibitshilik kóshesinen Respýblika dańǵylyna deiin velojol salamyz. Memleket basshysy buqaralyq sporttyń damýyna erekshe kóńil bóledi. Sebebi kásibi sport pen salaýatty ómir saltyna deiingi jol aýla sporty – qoǵamdyq keńistikter men aýlalardan bastalady. Olar ár adamǵa qoljetimdi bolýy tiis. Biyl 54 iri qoǵamdyq keńistik pen 150 aýla jasap, abattandyrdyq. Bunyń ózi ǵana 300 myńnan astam adamdy qamtýǵa múmkindik berdi. Bul jumystardy kelesi jyly da jalǵastyramyz», – dep jazdy Altai Kólginov.
