Qazaqstannyń animatsiialyq kinostýdiialary qaýymdastyǵy elordada Shyǵarmashyl jastardyń ortalyǵyn ashýdy usyndy, dep habarlaidy QazAqparat.
«Elordada keremet Oqýshylar saraiy bar. Onda túrli úiirmeler jumys isteidi jáne balalar sol jerde tálim alyp júr. Endi elordamyzǵa Shyǵarmashyl jastardyń ortalyǵy kerek. Bizdiń qaýymdastyqta qazir 8 animatsiialyq kinostýdiia bar. Olar árbir jerde ai saiyn 300-400 myń teńge arenda tólep, jan-jaqta shashyrap júr. Eger osyndai shyǵarmashyl ortalyq bolsa, biz bir jerde shoǵyrlanar edik», - dedi Qazaqstannyń animatsiialyq kinostýdiialary qaýymdastyǵynyń tóraǵasy Jánibek Orazaly.
Osy oraida ol Nur-Sultan qalasynda bul iske úles qosa alatyn kompozitorlar, sýretshiler bar ekenin atap ótti.
«Sonyń barlyǵyn jinaqtaityn shyǵarmashylyq ortalyq kerek siiaqty. Biz jalǵa alý somasyn tóleýge daiynbyz. Osy oraida jeńildikter bolsa, tipten jaqsy bolar edi. Óitkeni shetelden mamandar kelgen kezde, tájiribe almasyp, birlese jumys isteitin arnaiy oryn bolmai tur», - dedi ol.
