Elordadaǵy saýda ortalyqtarynyń birinen quny 2,5 mln teńge bolatyn saǵat urlaǵan kúdik ustaldy, dep habarlaidy QazAqparat.
Nur-Sultan qalalyq Politsiia departamentiniń málimetishe, elorda turǵyny Seifýllin kóshesi boiyndaǵy saýda úiinde ornalasqan dúńgirshekten belgisiz adamnyń qymbat saǵat urlap ketkeni týraly shaǵym túsirgen. Tekserý barysynda zardap shegýshiniń quny 2,5 mln teńge bolatyn 585 synamaly Cartier markaly altyn saǵatty satýǵa jarnama jasaǵany anyqtalǵan.
«Atalǵan taýarǵa er adam qyzyǵýshylyq tanytyp, telefon arqyly hat almasý barysynda saýda úiinde kezdesip, saǵatty kórmek bolady. Túski as ýaqytynda dúńgirshekke kelgen er adam saǵatty muqiiat qaraý úshin úlkeitkish áinek suraidy. Dál osy sátte dúńgirshekke bir áiel kirip, saqina tańdai bastaidy. Satýshy klientpen alań bolyp jatqan sátte er adam altyn saǵatty alyp qashyp ketken», - dedi departamentten.
Osydan keiin kúdikti ustaý is-sharalary birden qabyldanyp, kóp uzamai qolǵa tústi.
«Ol 22 jastaǵy qala turǵyny bolyp shyqty. Kúdikti altyn saǵatty 280 myń teńgege lombardqa ótkizip úlgergen. Atalǵan fakti boiynsha QR QK 191-babymen sotqa deiingi tergeý júrgizilip jatyr. Ustalǵan jigit kinásin moiyndady. Zattai aiǵaq tárkilendi. Kúdikti ýaqytqa oqshaýlaǵyshqa qamaldy», - delingen vedomstvo aqparatynda.
