ەلورداداعى ساۋدا ورتالىقتارىنىڭ بٸرٸنەن قۇنى 2,5 ملن تەڭگە بولاتىن ساعات ۇرلاعان كٷدٸك ۇستالدى, دەپ حابارلايدى قازاقپارات.
نۇر-سۇلتان قالالىق پوليتسييا دەپارتامەنتٸنٸڭ مەلٸمەتٸشە, ەلوردا تۇرعىنى سەيفۋللين كٶشەسٸ بويىنداعى ساۋدا ٷيٸندە ورنالاسقان دٷڭگٸرشەكتەن بەلگٸسٸز ادامنىڭ قىمبات ساعات ۇرلاپ كەتكەنٸ تۋرالى شاعىم تٷسٸرگەن. تەكسەرۋ بارىسىندا زارداپ شەگۋشٸنٸڭ قۇنى 2,5 ملن تەڭگە بولاتىن 585 سىنامالى Cartier ماركالى التىن ساعاتتى ساتۋعا جارناما جاساعانى انىقتالعان.
«اتالعان تاۋارعا ەر ادام قىزىعۋشىلىق تانىتىپ, تەلەفون ارقىلى حات الماسۋ بارىسىندا ساۋدا ٷيٸندە كەزدەسٸپ, ساعاتتى كٶرمەك بولادى. تٷسكٸ اس ۋاقىتىندا دٷڭگٸرشەككە كەلگەن ەر ادام ساعاتتى مۇقييات قاراۋ ٷشٸن ٷلكەيتكٸش ەينەك سۇرايدى. دەل وسى سەتتە دٷڭگٸرشەككە بٸر ەيەل كٸرٸپ, ساقينا تاڭداي باستايدى. ساتۋشى كليەنتپەن الاڭ بولىپ جاتقان سەتتە ەر ادام التىن ساعاتتى الىپ قاشىپ كەتكەن», - دەدٸ دەپارتامەنتتەن.
وسىدان كەيٸن كٷدٸكتٸ ۇستاۋ ٸس-شارالارى بٸردەن قابىلدانىپ, كٶپ ۇزاماي قولعا تٷستٸ.
«ول 22 جاستاعى قالا تۇرعىنى بولىپ شىقتى. كٷدٸكتٸ التىن ساعاتتى 280 مىڭ تەڭگەگە لومباردقا ٶتكٸزٸپ ٷلگەرگەن. اتالعان فاكتٸ بويىنشا قر قك 191-بابىمەن سوتقا دەيٸنگٸ تەرگەۋ جٷرگٸزٸلٸپ جاتىر. ۇستالعان جٸگٸت كٸنەسٸن مويىندادى. زاتتاي ايعاق تەركٸلەندٸ. كٷدٸكتٸ ۋاقىتقا وقشاۋلاعىشقا قامالدى», - دەلٸنگەن ۆەدومستۆو اقپاراتىندا.
