Elordada ókpesi 100% zaqymdanǵan naýqas jazylyp shyqty. 20 kún boiy reanimatsiiada bolǵan Ashat Otyzbaev dárigerlerdiń arqasynda dertinen aiyǵyp, búgin úiine shyǵaryldy, dep habarlaidy "Ult aqparat" qala ákimdigine silteme jasap.
«Búgin shyǵaryp jatqan naýqasymyz Ashat Otyzbaev 25 shildede aýrýhanamyzǵa kelip tústi. Úshinshi kúni tynys alýy qiyndap, jaǵdaiy nasharlap ketti. Sol kezde taǵy kompiýter tomografiiasyna túsirip tekserdik, ókpesi 100 paiyz zaqymdanyp ketken eken. Soǵan bailanysty ony reanimatsiia bólimine aýystyrdyq. 20 kún boiy jansaqtaý bóliminde jatyp, jaǵdaiy jaqsarǵan soń búgin úiine shyǵaryp saldyq», - dedi №3 Kópbeiindi qalalyq aýrýhanasynyń pýlmanolog-dárigeri Saparkúl Berdeshova-Ábildaeva.
Dárigerlerdiń aitýynsha, Ashattyń jaǵdaiynyń tym nasharlap ketýine onyń vaktsina almaǵany sebep bolǵan.
«Sebebi, naýqastyń jasyna qaramastan eger ol ekpe alsa aýrý jeńil ótedi jáne vaktsinatsiialanǵandar arasynda jansaqtaý bólimine túsetinder saýsaqpen sanarlyq», deidi dárigerler.
«Aýrýhanaǵa túsken kezde júre almaitynmyn, tipti sóileýge mursham bolmady. Qazir ózim júrip-turyp, sóilep otyrmyn. Dárigerlerge alǵysym sheksiz!» - deidi naýqas Ashat Otyzbaev.
Aita keteiik, koronavirýs infektsiiasyn jeńýdiń jalǵyz, tiimdi joly – vaktsinatsiia arqyly ujymdyq immýnitetti damytý.
