Elordanyń bas memlekettik sanitarlyq dárigeri Sarhat Beisenova qala turǵyndaryna úndeý joldap, mereke kúnderi adamdar kóp jinalatyn oryndarǵa barýdan bas tartýǵa jáne epidemiologiialyq ahýaldy turaqtandyrý úshin karantindik sharalardy saqtaýǵa shaqyrdy. Bul týraly Nur-Sultan qalasy ákimdiginiń resmi saity habarlady.
Elordanyń sanitarlyq dárigeriniń aitýynsha, tájiribe kórsetkendei, ár merekeden keiin epidemiologiialyq jaǵdai áleýmettik bailanystardyń artýyna, karantindik sharalardyń qabyldanbaýyna bailanysty nasharlaidy. Sonymen, ótken merekelerden keiin elorda "jasyl" aimaqtan "sary" aimaqqa qaita oraldy.
"Birlesken kúsh-jigerdiń arqasynda jaǵdaidy birshama jaqsarta aldyq, endi sol eńbegimiz zaia ketpese igi. Aldaǵy mereke kúnderi monitoringtik toptardyń jumysy kúsheitiletinin atap ótkim keledi. Tekserýler tek bireýdi jazalaý nemese aiyppul salý úshin ǵana emes, aldyn-alý sharalarynyń oryndalýyn qamtamasyz etý úshin de júrgiziletinin túsiný kerek. Qaladaǵy epidemiologiialyq jaǵdai osyǵan bailanysty", - dep atap ótti Sarhat Beisenova.
Ol "Ashyq" jobasyna qatysatyn obektilerde ótkiziletin is-sharalardy qospaǵanda, barlyq kelýshiler men barlyq personaldyń "jasyl" mártebesi bolǵan kezde ǵana 50%-ǵa deiin, biraq 70-ten aspaityn orynǵa toltyrylatyn is-sharalardy qospaǵanda, otbasylyq, korporativterdi qosa alǵanda, buqaralyq is-sharalarǵa tyiym salynǵanyn eske saldy. Azamattarǵa elordadaǵy epidemiologiialyq jaǵdai jaqsarǵanǵa deiin shekteýli aýmaqta adamdardyń jappai bolýyn kózdeitin saltanatty is-sharalar men merekelerdi ótkizýden bas tartýǵa keńes beriledi.
Sondai-aq, balalardyń qatysýymen ótetin jalpy mekteptik jáne ujymdyq erteńgilikterdi uiymdastyrýǵa jáne ótkizýge tyiym salynady.
"Men ata - analardy, basqa óńirlerden kelgen qonaqtardy jáne búkil qala halqyn osy talaptarǵa túsinistikpen qaraýǵa shaqyramyn. Jańa jylda osy pandemiiany jeńip, ómirdiń burynǵy qalpyna oralaiyq dep tileimin", - dep qorytyndylady spiker.
