Elordada koronavirýspen aýyrǵandar arasynda áielder úlesi joǵary bolyp otyr. Bul týraly Nur-Sultan qalalyq taýarlar men kórsetiletin qyzmetterdiń sapasyn jáne qaýipsizdigin baqylaý departamentiniń basshysy Zeken Ysqaqov aitty, dep habarlaidy QazAqparat.
«Nur-Sultan qalasynda 13 naýryz ben 14 qazan aralyǵynda COVID-19-dyń 14 234 jaǵdaiy tirkeldi. Jas qurylymy boiynsha COVID-19 juqtyrǵan 40-tan 65 jasqa deiingi adamdar sanynyń ósýi baiqalady. Qazirgi ýaqytta koronavirýs aýrýy jaǵdailaryn tirkeý jalǵasýda. Táýligine 3-ten 20-ǵa deiin jaǵdai tirkeledi. Ersekter arasynda da, mektep jasyndaǵy balalar arasynda da tirkelý bar. Sońǵy 4 kúnde reprodýktivtilik sany birden joǵary bolyp otyr. Bul qaladaǵy karantin sharalaryn jeńildetýge múmkindik bermeidi. 9 aidyń ishinde aýyrǵan áielderdiń úlesi artyp, 53 paiyzǵa jetti», - dedi ol.
Osy oraida departament basshysy COVID-19 virýsynyń aldyn alý úshin 2020 jyldyń 13 qazanynda Nur-Sultan qalasynyń bas memlekettik sanitarlyq dárigeriniń elordada shekteý sharalary men karantin tártibin kúsheitý týraly №243 jańa qaýlysy shyqqanyn aitty.
«Atalǵan qaýlyǵa sáikes, biznes-ortalyqtar jumys jáne demalys kúnderi saǵat 9:00-den 18:00-ge deiin qyzmet etedi. Demalys kúnderi olarda ornalasqan azyq-túlik emes taýarlar men zattar satatyn dúńgirshekterdiń (bólimderdiń) jumysyna tyiym salynady. Qoǵamdyq tamaqtandyrý obektileriniń jumysy ornalasqan jerine qaramastan saǵat 22:00-ge deiin belgilenedi», - dedi Zeken Ysqaqov.
