Nur-Sultan qalasynyń densaýlyq saqtaý basqarmasy elordada kópirden sekirip ketken júkti áieldiń jaǵdaiy týraly málimet berdi, dep habarlaidy QazAqparat.
Qalalyq densaýlyq saqtaý basqarmasy baspasóz qyzmetiniń habarlaýynsha, áieldiń qursaǵyndaǵy balasy ázirge aman.
«Jaǵdaiy turaqty. Meditsina qyzmetkerleriniń baqylaýynda, tekserýden ótip jatyr. Beiindi mamandardyń barlyq qajetti kómegin alyp jatyr», - dedi qalalyq densaýlyq saqtaý basqarmasynyń ókilderi.
Eske sala keteiik, keshe elordalyq politseiler ózenge sekirgen júkti áieldi qutqarǵan bolatyn.
3 qazan kúni astanalyq politsei Almaz Qultanov Qabanbai batyr dańǵylynda qyzmet babymen júrip, saǵat 12:20 shamasynda «Ramstor» saýda úii mańyndaǵy Esil ózeniniń kópirinde beitanys qyzdyń ádetten tys áreketterin baiqap qalady.
Kenet qyz syrt kiimderin sheship, sýǵa sekirýge árekettenedi. Ol dereý jedel basqarý ortalyǵynyń kezekshisine habarlap, ózi kópirge qarai betteidi.
Ol kezde áiel de sýǵa sekirip úlgergen edi. Qultanov ta onyń artynan sýǵa sekiredi.
«Tártip saqshysy áielge deiin júzip baryp, kiiminen ustap, jaǵaǵa qarai bet aldy. Osy kezde serikteri Asylhan Nurmuhambetov qutqarý sheńberin laqtyryp, Nursultan Sariev te serigine kómektesý úshin sýǵa sekirdi», - dep jazady Polisia.kz.
