Nur-Sultan qalasy ákiminiń orynbasary Baqtiiar Máken karantin kezinde qala kóshelerine shyqqan turǵyndardyń kóbeiýine qatysty pikir bildirdi, dep habarlaidy "Ult aqparat".
Ortalyq kommýnikatsiialar qyzmetindegi onlain baspasóz máslihatynda oǵan kommýnaldyq qyzmetter úshin 15 teńge kóleminde ótemaqyny tóleý qashan bastalatyndyǵy jóninde saýal joldandy.
«Úkimet tarapynan tiisti arnaiy nusqaý erejesi shyqty. Sol erejege sáikes, arnaiy shtabpen osy máseleni qarastyryp jatyrmyz. Búgingi tańda 54 myńdai adamǵa osy 15 myń teńgelik kommýnaldyq ótemaqyny berý múmkindigin qarastyrýdamyz», - dedi ákim orynbasary.
Osy oraida ol qazirgi tańda qajetti jumystardy elektrondy túrde Smart Astana arqyly iske asyrý josparlanyp otyrǵanyn atap ótti.
«1-2 kúnniń ishinde tiisti sharalardy atqaramyz. Sáikesinshe, aqparat quraldaryna tiisti málimetti jariialaimyz. Bul jumystardy Smart Astana bazasynda iske asyramyz ba dep otyrmyz», - dedi Baqtiiar Máken.
Budan buryn habarlanǵandai, QR Indýstriia jáne infraqurylymdyq damý ministrligi karantinge jabylǵan óńirlerdegi halyqtyń jekelegen sanattarynyń kommýnaldyq shyǵyny úshin 15 myń teńgeden aýdarylatynyn málim etti.
Naqtyraq aitqanda, karantin engizilgen óńirlerde ákimdikter tutynýshylardyń derbes (abonenttik) shottaryna 2 ai boiy 15 myń teńgeden aýdaryp otyrady. Memlekettik organdardyń usynysy negizinde tólem alýshylardyń kelesi sanattary aiqyndalǵan.
Olar: - 1, 2, 3 top múgedekteri;
- múgedek balalardy tárbielep otyrǵan otbasylar;
- kópbalaly otbasylar;
- UOS múgedekteri men qatysýshylary, UOS múgedekteri men qatysýshylaryna teńestirilgen tulǵalar;
- memlekettik nemese qoǵamdyq mindetterin, áskeri qyzmetin oryndaý barysynda, ǵarysh keńistigine ushýǵa daiyndyq barysynda nemese ushý kezinde, adam ómirin qutqarý jáne quqyq tártibin saqtaý kezinde qaza tapqan tulǵalardyń otbasylary;
- tómen jáne odan az zeinetaqy alatyn zeinetkerler;
- ataýly áleýmettik kómek alatyn azamattar, onyń ishinde jalǵyzbasty zeinetkerler.
Kommýnaldyq qyzmetter úshin 15 myń teńge tóleýge ótinim qabyldaý ákimdikter ótinim qabyldaityn arnaiy júieni iske qosqan soń bastalady.
