Búgin Astananyń Qoǵamdyq keńesi qoǵamdyq kóliktegi tarifter boiynsha tyńdaýlar ótkizip jatyr, dep habarlaidy QazAqparat tilshisi.
«Astana LRT» JShS-niń basqarma tóraǵasy Bekmyrza Igenberdinovtiń aitýynsha, qalalyq qoǵamdyq kólikte saralanǵan tarif engiziletin bolady. Atalǵan tarifke sáikes elordanyń jeńildik sanaty bar azamattary burynǵydai qoǵamdyq kólikte tegin júre beredi. Jalpy saralanǵan tarifke qoǵamdyq kólik salasyndaǵy qarajattyń «kóleńkeli» ainalymynan ketý jáne qala biýdjetine aqsha túsimderin arttyrý maqsatynda bastamashylyq etilgen. Túsken qarajat elordanyń kólik júiesin damytýǵa jumsalady.
«Saralanǵan tarif engizilgen kezde qoǵamdyq kólikte jol júrý quny kólik kartasymen tóleý kezinde 90 teńgeni quraidy. Al qoǵamdyq kólikti jii paidalanbaityn nemese karta alýdy qajetsinbeitinder úshin jol júrý quny 180 teńge bolady. Bul jolaýshylarǵa qoǵamdyq kólikte qolma-qol aqshasyz esep aiyrysýǵa kóshýge jaqsy sebep bolmaq ári ol tólem júiesiniń ashyqtyǵyna oń yqpalyn tigizeri anyq», - dedi B.Igenberdinov.
Qaýly jobasyna sáikes, qalalyq baǵdarlarda jolaqysyn qolma-qol tóleý kezinde 180 teńgeni, ekspress baǵdarlarda 250 teńgeni quraityn bolady. Al avtobýstaǵy kartamen tólem jasaýǵa arnalǵan qurylǵy jumys istemegen kezde jolaýshylar tegin júre alady.
