Elordada «Jastar uiymdarynyń netvorkingi jáne tájiribe almasýy» atty joba barysynda qazaqstandyq-amerikalyq jastar forýmy ótti. Jiyn barysynda eki eldiń jastar uiymdary ókilderi ózara tájiribe bólisip, pikir almasty.
Atalǵan joba «Azamattyq bastamalardy qoldaý ortalyǵy» KEAQ-nyń memlekettik granty aiasynda, QR Aqparat jáne qoǵamdyq damý ministrliginiń qoldaýymen uiymdastyryldy.
Jiynǵa QR Aqparat jáne qoǵamdyq damý vitse-ministri Daniiar Esin, «Kazakhstan Trade Council» direktory Devid M.Valera, MIT ýniversiteti qyzmetkeri, jas belsendi Chelsi Konard, «Eriktiler ligasy» qoǵamdyq qorynyń tóraiymy Aisulý Erniiazova, «Jas Otan» jastar qanatynyń jetekshisi Dáýlet Káribek jáne birqatar belsendi jastar qatysyp, sóz sóiledi.
Forým aiasynda eki el jastary ózderin qyzyqtyratyn túrli baǵyttar boiynsha pikir almasyp, birlesken jobalardy júzege asyrý joldaryn talqylady.
«Amerika men Qazaqstan jastary arasyndaǵy ekijaqty bailanysty damytýǵa óz úlesimdi qosa alǵanyma qýanyshtymyn. Qazaqstan memleket úshin ǵana emes, jastary úshin de kóp jaqsy dúnieler jasap keledi. Negizgi faktor retinde bilim berý salasyndaǵy óte mańyzdy jobalardyń biri – «Bolashaq» baǵdarlamasyn aitar edim. Eýropada jáne AQSh-ta 13 myńnan astam jas bilim aldy. Bul jastarǵa berilip otyrǵan úlken múmkindik jáne bolashaqqa myqty investitsiia. Bul – úlken jetistik», - deidi «Kazakhstan Trade Council» direktory Devid M.Valera.
Forýmnyń qorytyndy bóliminde qos tarap eki el arasyndaǵy yntymaqtastyqty nyǵaitý maqsatynda «Bolashaq» Qaýymdastyǵy, «Azamattyq bastamalardy qoldaý ortalyǵy» jáne «Kazakhstan Trade Council» úshjaqty memorandýmǵa qol qoidy.
Sonymen birge «Jas Otan», «Indiana University Fencing Club», «Astana Jastary» jáne «Words Can Soar» halyqaralyq uiymy arasynda memorandým jasaldy.
