Elordada iri saýda, oiyn-saýyq ortalyqtary, fitnes-ortalyqtar, qurylys materialdaryn satatyn iri dúkender jumysyn bastady. Osyǵan orai BAQ ókilderi sanitarlyq-epidemiologiialyq talaptardyń saqtalýyn baqylaý úshin qaladaǵy iri nysandardy aralap qaitty, dep habarlaidy QazAqparat.
«Ózderińiz bilesizder, 15 tamyz kúni Qazaqstannyń bas memlekettik sanitar dárigeriniń №47 jáne 48-inshi óte mańyzdy eki qaýlysy shyqty. Sonymen qatar Nur-Sultan qalalyq bas sanitar dárigeriniń №229 qaýlysy jariialandy. Atalǵan qaýlylarǵa sáikes, saýda, oiyn-saýyq ortalyqtary qyzmetine qaita kirisip, aptasyna 5 táýlik jumys isteitin bolady. Senbi-jeksenbi jumys istemeidi. Fitnes-ortalyqtar da ashylǵanymen qysqartylǵan jumys kestesine sáikes tańerteńgi 07.00-den 17.00-de deiin qyzmet kórsetedi», - dedi Nur-Sultan qalasy ákimdigi saýda men qyzmet kórsetý salasyn damytý bólimniń basshysy Rýslan Ydyrysov iri saýda, oiyn-saýyq ortalyqtarynyń jumys isteý barysyn BAQ ókilderine kórsete kele.
Onyń atap ótýinshe, atalǵan qaýlylarǵa sáikes, saýda ortalyqtary birneshe talapty oryndaýy tiis. Iaǵni, eń aldymen, áleýmettik araqashyqtyq saqtalyp, adamdar mindetti túrde maska taǵýy qajet. Sonymen qatar saýda nysanynda árbir 50 metr saiyn sanitaizerler ornatylýy tiis.
«Qala aýmaǵynda iri 9 saýda, oiyn-saýyq ortalyǵy bar. Olardyń barlyǵy da jumys isteýge daiyn boldy. Keshe barlyǵy tekserýden ótti. Búginnen bastap shamamen 8,5 myń adam jumysyna kirisedi. Búgin biznestiń shamamen 60 paiyzǵa jýyǵy qyzmetterin bastady. Keibiri bolmashy eskertýler alyp, búgin ne osy aptanyń ishinde ony joiǵannan keiin ashylady», - dedi ol.
Rýslan Ydyrysovtyń aitýynsha, elordada kinoteatrlar, toihanalar jumysyna tyiym saqtalady. Eger koronavirýstyń taralýy qazirgi deńgeiden tómendep jatsa, onda olardyń jumysyna ruqsat berý máselesi qaralady.
Qurylys materialdaryn satatyn iri saýda ortalyqtarynyń birinde de jumys bastaldy. Karantin kezinde elordalyqtarǵa onlain rejimde qyzmet kórsetken dúkenge búgin ashylǵan sátten bastap 2-3 saǵattyń ishinde 500-ge jýyq adam kelgen.
«Biz árbir 15 minýt saiyn qazaq jáne orys tilderinde saýda zalynyń ishinde qaýipsizdik talaptaryn saqtaý qajettigin habarlap otyramyz. Árbir 50 metr saiyn sanitaizerler ornattyq. Qyzmetkerlerimizdiń barlyǵyn maskamen jáne qolǵappen tolyqtai qamtamasyz ettik. Dúkenge kelgen adamdardyń barlyǵynyń dene qyzýy ólshenedi», - dedi elordadaǵy qurylys materialdaryn satatyn gipermarketterdiń biriniń direktor orynbasary Oksana Sýhorýkova.
