Nur-Sultan qalasynyń ákimi Altai Kólginov elordaǵa taǵy 1 mln maska jetkizilgenin málim etti, dep habarlaidy QazAqparat.
«Biz eń birinshi kezekte Densaýlyq saqtaý ministrligimen jáne «SK-Farmatsiiamen» birge maskalardy meditsinalyq qyzmetkerlerge, blok-posttarda eńbek etetin qyzmettegilerge, qalany patrýldeitin qyzmetkerlerge, jedel járdem qyzmetkerlerine jáne ártúrli aýrýmen esepte turǵan azamattarǵa tegin beremiz. Osy adamdarǵa qazirdiń ózinde 300 myń meditsinalyq maska tegin taratyldy. Sondai-aq «Nur Otan» partiiasynyń volonterlary áleýmettik turǵyda az qamtylǵan azamattarǵa maskalardy tegin taratady. Iri gipermarketterde 30 myń maska berdik. Iaǵni osydan bylai sýpermarketter men gipermarketterge qatań talap qoidyq: adamdar kirgen kezde qolyn jýyp, sanitarlyq talapty saqtaýy kerek», - dedi Altai Kólginov Tengriniýs.kz portalyna bergen tikelei efirdegi suhbatynda.
Qala basshysy qazirgi tańda elordaǵa taǵy 1 mln maska jetkizilgenin aityp ótti.
«Álbette, jetispeýshilik seziledi. Sebebi adamdar áý basta maskany jappai satyp alyp ketken. Qazir bir adamǵa 5 maskadan ǵana taratamyz. Biraq árbir usaq dárihanada maska bar dep aita almaimyn. «Evrofarm», «Gippokrat», «Biosfera» sekildi dárihanalarmen jumys júrgizýdemiz», - dedi ol.
Altai Kólginov qaladaǵy «Iýtari» kompaniiasy maska tige bastaǵanyn málim etti.
«Másele baqylaýda. Kelesi aptada qalamyzǵa taǵy da maskalar men antiseptikter jetkiziledi», - dedi ol.
