Nur-Sultan qalasy ákiminiń orynbasary Baqtiiar Makenniń tóraǵalyǵymen tótenshe jaǵdailardyń aldyn alý jáne joiý jónindegi qalalyq komissiiasynyń qashyqtan otyrysy ótti. Bul týraly "Ult aqparat" ákimdikke silteme jasap habarlaidy.
Elorda ákimdigi janyndaǵy tótenshe jaǵdailardyń aldyn alý jáne joiý jónindegi komissiiasynyń taldaý jáne monitoring tobynyń jetekshisi Shyńǵys Qýatbekov komissiia otyrysynda berilgen hattamalyq tapsyrmalardyń oryndalýy týraly baiandady. «5-27 shilde aralyǵynda mobildi monitoring toptary 658 kásipkerlik sýbektilerine sanitariia normalaryn saqtaý boiynsha tekserý ótkizip, 364 sýbektide buzýshylyqtar anyqtady. Taýarlar men kórsetilgen qyzmetterdiń sapasy men qaýipsizdigin baqylaý departamentimen karantin sharalary kezeńinde jumys rejimin buzǵany úshin 63 ákimshilik material jinaldy», – dedi Sh. Qýatbekov.
Komissiia otyrysynda qatysýshylar karantindi jeńildetýge daiyndyq máselelerin de talqylady. Qala ákiminiń orynbasary aýrýdyń taralýyna jol bermeý úshin saýda ortalyqtary, saýda úileri men biznes ortalyqtar basshylarymen ashylý kezinde karantin sharalaryn saqtaý qajettiligi týraly túsindirme jumystaryn júrgizýdi, karantin kezinde qyzmetti júrgizýge ruqsat alý tártibin ázirleýdi jáne kásipkerlerge keńes berýdi uiymdastyrýdy tapsyrdy.
«Memleket basshysynyń tapsyrmasy boiynsha aýrýdyń taralýyn tómendetý, halyq arasynda belsendi túrde túsindirý jumystaryn júrgizý, karantin jáne aldyn alý sharalaryn saqtaý bizdiń basty mindet. Shekteýler birtindep alynady dep kútilýde. Alaida, kásiporyndar men mekemelerdiń jumysyn jandandyrý koronavirýsqa deiingi ómir saltyna qaita oralýdy bildirmeidi. Mindetti túrde maska taǵý, áleýmettik qashyqtyq pen gigiena talaptary saqtalady. Halyqqa qyzmet kórsetetin barlyq mekemeler, atap aitqanda, halyqqa qyzmet kórsetý ortalyqtary, bankter, qyzmet kórsetý ortalyqtary áleýmettik qashyqtyq belgilerin ornatýy kerek. Sýbektilerdiń qyzmeti qaita bastalǵan kezde, órtke qarsy jumysty kúsheitý jáne órt qaýipsizdigin qamtamasyz etý qajet. Talaptardy buzǵany úshin jaýapkershilik deńgeii joǵary bolýy kerek. Sondyqtan, taýarlar men kórsetilgen qyzmetterdiń sapasy men qaýipsizdigin baqylaý departamenti aýdan ákimdikterimen birge barlyq kásipkerlik sýbektileriniń basshylarymen maqsatty túsindirý jumystaryn júrgizýi qajet», – dedi B.Maken.
Sonymen qatar, qorshaǵan ortany qorǵaý jáne tabiǵatty paidalaný basqarmasyna demalys kúnderi qoǵamdyq oryndarda aýqymdy dezinfektsiia júrgizý, qaýipsizdik sharalaryn saqtaý, onyń ishinde maska taǵý, áleýmettik qashyqtyq saqtaý boiynsha politsiia departamentine reidterdi jalǵastyrý tapsyryldy.
