Nur-Sultan qalasynyń bas sanitarlyq dárigeri Janna Pralieva qala turǵyndaryn koronavirýsqa qatysty talaptardy oryndaýǵa shaqyrdy, dep habarlaidy "Ult aqparat".
Onyń sózine qaraǵanda, qoǵamdyq tamaqtaný nysandarynyń, oiyn-saýyq mekemeleriniń ieleri birneshe ret ákimshilik jaýapkershilikke tartylǵanyna qaramastan, shekteý jáne karantin sharalaryn saqtamai, óz qyzmetin júzege asyrýdy jalǵastyrýda.
«Kásipkerlik sýbektileriniń arasynda karantin rejimin birneshe ret buzǵandar bar. Mysaly, Turan dańǵyly (Esil aýdany) boiynda ornalasqan jazǵy kafesi bar Auraclub Alanya túngi klýby shekteý jáne karantin sharalaryn buzǵany úshin segiz ret ákimshilik jaýapkershilikke tartyldy. Atap aitqanda, belgilengen jumys rejimi men maska rejimi, áleýmettik qashyqtyq saqtalmaidy, sondai-aq tyiymǵa qaramastan túngi klýb pen karaoke-zaldary jumys istegen», - dedi J. Pralieva baspasóz máslihatynda.
