Jańa alleianyń ashylýy týraly búgin qalalyq máslihattyń turaqty komissiiasynyń otyrysynda belgili boldy, dep habarlaidy QazAqparat tilshisi.
«Elordanyń Saryarqa aýdanynda ornalasqan alleiany «Qalamgerler alleiasy» degen ataý berýdi usynamyz. Alleia «Jastar» saraiynan Q. Qýanyshbaev atyndaǵy qazaq drama teatryna deiingi aýmaqty alyp jatyr. Bul bastamany Jazýshylar odaǵy men birqatar ziialy qaýym ókilderi qoldap otyr. Óitkeni atalǵan oryn Abai eskertkishine, Abai dańǵylyna, S.Seifýllin murajaiyna jaqyn ornalasqan. Iaǵni, halyq eń jii aralaityn oryndardyń biri», - dedi Nur-Sultan qalasy Tilderdi damytý jáne muraǵat isi basqarmasynyń basshysy Tileýǵali Qyshqashbaev máslihat otyrysynda.
Onyń málimdeýinshe, ústimizdegi jyldyń 24 shildesinde qalalyq onomastika komissiiasynyń otyrysynda atalǵan bastama oń sheshimin tapty.
«Sondyqtan qalalyq máslihat músheleri sizderden Nur-Sultan qalasynyń «Saryarqa» aýdanynda ornalasqan ataýsyz alleiaǵa «Qalamgerler alleiasy» ataýyn berý týraly usynysty qarastyryp, qoldaý bildirýlerińizdi suraimyz», - dedi ol.
Óz kezeginde, qalalyq máslihattyń turaqty komissiia músheleri alleiaǵa «Qalamgerler» ataýyn berýdi biraýyzdan qoldady.
