Elorda ákimdigi egiz bala úshin balabaqshaǵa oryn alýǵa «pakettik» rejimdi iske qosty, dep habarlaidy "Ult aqparat" qala ákiminiń orynbasary Malika Bekturovaǵa silteme jasap.
«Ata-analar bizge balabaqshaǵa barýdaǵy keibir problemalardy anyqtaýǵa kómektesti. Solardyń biri egiz balalarǵa arnalǵan oryndar bolatyn. Buryn egizderge oryndy jeke-jeke izdeý kerek bolatyn. Sondyqtan bir balabaqshaǵa jáne bir topqa joldama alý múmkin bolmady. Endi, eger sizdiń jeke kabinetińizde egiz balanyń kezekte turý boiynsha birneshe ótinish bolsa, júie ony anyqtaýǵa kómektesedi», - deidi M.Bekturova.
Atap aitqanda, e.astana.kz saitynda balalaryńyzdyń birine joldamany rásimdeisiz, al baǵdarlama egizdiń ekinshisine oryn tabýǵa kómektesedi.
Bul qalai jumys isteidi?
• Birinshiden, baǵdarlama sol topta oryn tabýǵa tyrysady.
• Eger ol bolmai qalsa, júie basqa toptarda da izdep kóredi.
• Eger oryndar jetkiliksiz bolsa, onda izdeý nátijesi sátsiz bolǵandyǵy týraly málimet beriledi.
• Eger ótinish berýshi júie tańdaǵan oryndarǵa qanaǵattansa, onda ol tańdaýdy rastaidy nemese odan bas tarta alady. Rastaǵan jaǵdaida «joldamany alý» túimesi basylyp, júie egizderge dereý joldama beredi.
