Nur-Sultanda eki dosyn júksalǵyshqa salyp qydyrtqan júrgizýshi ustaldy, dep habarlaidy "Ult aqparat" Polisia.kz portalyna silteme jasap.
Instagram áleýmettik jelisinde eki jigit tań samalymen Nur-Sultandaǵy Tilendiev kóshesinde kóliktiń júksalǵyshyna otyryp qydyrǵan video paida boldy.
Oqiǵa 19 maýsym tańǵy 04:03-te bolǵan. «VAZ-2115» avtokóliginiń júrgizýshisi jol qozǵalysy erejesin buzyp, eki dosyn júksalǵyshqa otyrǵyzyp alǵan.
Kólik júrgizýshisi 28 jastaǵy elorda turǵyny bolyp shyqty.
Oǵan QR ÁQBK «Jol júrisi qaǵidalarynda kózdelgen jolaýshylardy jáne júkterdi tasymaldaý, qaýipsizdik beldikterin nemese motoshlemderdi paidalaný jónindegi talaptardy saqtamaý» babynyń birinshi tarmaǵy boiynsha ákimshilik hattama toltyryldy.
Basqa tártip buzýshylar da ákimshilik jaýapkershilikke tartyldy.
