Elordada dámhanalardyń birinde gaz ballony jaryldy. Bul týraly QR Tótenshe jaǵdailar ministrliginiń resmi ókili Talǵat Ýáli málim etti, dep habarlaidy "Ult aqparat".
«2020 jyldyń 21 qarashasynda, saǵat 12:25-te Nur-Sultan qalalyq TJD kezekshi-dispetcherlik qyzmetiniń pýltine dámhana retinde jabdyqtalǵan kottedjde gaz ballonynyń jarylǵany týraly aqparat kelip tústi», - dedi Talǵat Ýáli.
Onyń atap ótýinshe, órt sóndirý qyzmeti oqiǵa ornyna jetken kezde úidiń ishinde bir qyz ben 15 gaz ballony bar ekeni anyqtalǵan.
«Jarylys saldarynan as bólmesiniń tóbesi opyrylyp túsken. Aldyn ala derekterge sáikes, qyz úiindi astynda qalyp qoiyp, oqiǵa ornynda qaza tapqan», - dedi resmi ókil.
Qazirgi ýaqytta oqiǵa ornynda Nur-Sultan qalalyq TJD-niń, Apattyq meditsina ortalyǵynyń 21 qutqarýshysy men 5 tehnikasy jumys istep jatyr.
