Elordada buqaralyq mediany retteý jónindegi zańnama tujyrymdamasyn talqylaýǵa arnalǵan konferentsiia ótip jatyr, dep habarlaidy QazAqparat tilshisi.
Sharaǵa QR Aqparat jáne qoǵamdyq damý ministriniń orynbasary Kemelbek Oishybaev, Konrad Adenaeýer atyndaǵy qordyń Qazaqstandaǵy ókildiginiń direktory Iohanes Rai, BAQ salasy men qoǵamdyq uiymdardyń ókilderi, zańgerler qatysýda.
Konferentsiia aiasynda buqaralyq kommýnikatsiia quraldarynyń qyzmetin zańnamalyq retteýdiń qaiǵadattary men maqsat-mindeti, media salany zańnamalyq retteýdiń problemalary, jýrnalisterdiń aqparatqa qol jetkizý múmkindikteri, aqparat salasynda memlekettik múdde men azamattardyń quqyǵyn úilestirý tetikteri, tsifrlyq dáýirdegi jýrnalistikanyń quqyqtyq qyrlary, dástúrli BAQ-ty qoldaý siiaqty máseleler talqylanbaq.
Eki sessiiaǵa josparlanǵan sharanyń birinshi bóligi «Buqaralyq mediany zańnamalyq retteýdiń tujyrymdamasy» degen taqyrypqa arnalsa, ekinshi bóliginde «Media zańnamasyn jetildirýdiń ózekti máseleleri» talqylanady.
«Biz osy arada túrli oilar men usynystardy esti alamyz dep oilaimyn. Zańnamalyq ózgerister salany damytýǵa jumys istegeni mańyzdy. Aqparattyq qaýipsizdik turǵysynan alsaq, qazaqstandyq BAQ ózara ǵana emes, halyqaralyq deńgeide de básekege túsip jatyr. sondyqtan otandyq BAQ-tyń básekege qabilettiligi joǵary deńgeide bolý kerek. Zańnamalyq ózgerister osy máselege de baǵyttalýy kerek dep esepteimiz», - dedi Aqparat jáne qoǵamdyq damý ministriniń orynbasary Kemelbek Oishybaev konferentsiianyń ashylýynda.
