Nur-Sultan qalasy ákiminiń orynbasary Baqtiiar Máken qaladaǵy kásipkerlik nysandaryndaǵy zańbuzýshylyqtar týraly aitty, dep habarlaidy QazAqparat.
«Tótenshe jaǵdai kezinde keibir kásiporyndar tarapynan ereje buzý jaǵdailaryn anyqtaýdamyz. Qalada kún saiyn qyzmetine ruqsat etilgen nysandardyń sanitarlyq normalardy oryndaýyna qatysty politseiler volonterlermen jáne ákimdik ókilderimen birlesip, reidter júrgizýde», - dedi B. Máken.
Onyń sózine qaraǵanda, tiisti merzimde sanitarlyq normalardyń saqtalmaýyna orai 15 nysannyń qyzmeti ýaqytsha toqtatyldy.
«Ákimdiktiń mobildi toptary turaqty túrde áleýmettik mańyzdaǵy azyq-túlik baǵasynyń negizsiz ósýi men sanitarlyq normalardy oryndamaý faktilerin anyqtaýǵa qatysty reidter júrgizedi. Baǵany negizsiz ósirgen birqatar kásipker jazalandy. Sýpermarketterdiń basshylary ákimshilik jazaǵa tartyldy, aiyppul somasy 100 ailyq eseptik kórsetkishti quraidy», - dedi B. Máken.
Budan buryn habarlanǵandai, 20 sáýirden bastap ónerkásiptik ári indýstrialdyq kásiporyndardyń jumysy jandandy.
Atalǵan sektorda 20 myńnan astam adam jumysqa kiristi. Sonymen qatar, qurylys salasynda 40 myńǵa jýyq adam jumysyn jalǵastyrdy.
