Elordada Aziia elderi qalamgerleriniń tuńǵysh forýmynyń saltanatty jabylý rásimi ótti. Shara qatysýshylaryna QR Mədeniet jəne sport ministri Aqtoty Raiymqulova quttyqtaý joldady. Ony ministrdiń orynbasary Nurǵisa Dáýeshov oqyp berdi, dep habarlaidy QazAqparat.
«Adamzat órkenieti búginde rýhani sabaqtastyqty, ortaq qundylyqtardy sińirý men nasihattaýǵa zárý. Osyndai jahandyq máseleni negizge alyp Aziia qalamgerleriniń I forýmy «Ortaq tamyr, ortaq dúnietanym, ortaq órkeniet» degen ataýmen ótkizildi. Bul bir jaǵynan ǵalamdyq taqyryp bolsa, ekinshi jaǵynan Qazaqstannyń birlik pen beibitshilikke baǵyttalǵan geosaiasi ustanymyn kórsetedi. Aziia qalamgerlerimen tájiribe almasa otyryp, ortaq rýhani qundylyqtardy pash etetin ashyq platforma qalyptastyrý syndy birqatar maqsat-mindetterdi kózdegen Tuńǵysh forýmymyz óz mejesine jetip otyr. Forýmnyń aiasynda aitylǵan syndarly pikir, tolymdy oilar ortaq tamyrdan nár alyp, ortaq dúnietanymǵa tereń boilap, ortaq órkenietti pash etetin qundy shyǵarmalar týǵyzýǵa septigin tigizedi degen oidamyn«, - dedi ministr.
Onyń dereginshe, Aziia aimaǵyndaǵy halyqtyń sany jer shary turǵyndarynyń úshten ekisin qurasa, álem halqynyń sany kóp 10 eldiń 6-ýy Aziia elderinen eken. Al Nur-Sultan qalasynda ótkizilgen Forýmǵa Aziia qurlyǵyn meken etip otyrǵan 38 shet memleketten 80-ge jýyq qalamgerdiń kelýi forýmnyń ǵalamdyq sipatta ekenin kórsetedi.
«Qazaqstan Respýblikasynyń Tuńǵysh Prezidenti – Elbasy N.Á.Nazarbaevtyń «Rýhani jańǵyrý» baǵdarlamasynyń aiasynda ótkizilip otyrǵan alqaly jiynda bas qosqan Nobel syilyǵynyń nominanttary, Býker jáne ASEAN ádebi júldesiniń laýreattary, ulttyq, memlekettik syilyqtardyń iegerleri, elimizdiń talantty qalamgerleri álemdi terbep, adami qundylyqtardy nasihattaýda baiyrǵy muralardy, miftik beinelerdi jańǵyrta paidalanýdyń mańyzy zor ekendigin baiandady. Aziia órkenieti týraly sóz bolǵanda birden oiǵa oralatyn Uly Jibek Jolynyń ekonomikalyq mańyzyn ǵana emes, onyń tutas órkenietterdi toǵystyratyn kúshke ie bolǵanyn eskerý qajettigin basa kórsetken Memleket basshysy Qasym-Jomart Toqaev óz baiandamasynda Aziia ádebietin odan ári damytý úshin birqatar mańyzdy máselelerge qalamgerlerdiń nazaryn aýdartty. Memleket basshysynyń «Aziia alyby» halyqaralyq ádebi syilyǵyn taǵaiyndaý jáne Aziia qalamgerleri týyndylarynyń birtutas elektrondy kitaphanasyn qurý týraly bildirgen usynystary barshamyzǵa oi tastap, serpin bergeni anyq», - dedi Aqtoty Raiymqulova.
Ministrdiń paiymynsha, jazýshynyń maqsaty – qoǵamnyń boiyna adamgershilik, izgilik qasietterin sińirý. «Adam» atty ári jasampaz, ári san qyrly álemniń qupiiasyna boilaý, onyń qily minezi men áreketteriniń qisynyn kórkem beineleý. Aziia halyqtaryn biriktiretin azamattyq ortaq qundylyqtar, ásirese jastardyń sanasyn jahandaný zamanynda uly murattarǵa baýlý bolmaq.
«Dástúrli Aziia órkenieti men pragmatik Eýropa mádenieti arasyndaǵy Uly Dalaǵa táýelsizdik týyn tikken qazaq eliniń astanasy Nur-Sultan qalasynda uiymdastyrylǵan kontinenttik asa iri forým bárimizge oi salyp, sizderdi jańa shyǵarmashylyq biikterge jeteleitinine senimmen qarap, qoǵam men adam úshin mańyzdy osyndai sharalar qajet!», - dedi ol.
Shara barysynda Aziia elderi qalamgerleriniń birinshi forýmy delegattaryn marapattaý rəsimi ótti. Qatysýshylarǵa estelik syilyq pen sertifikattar tabystaldy. Odan keiin gala-kontsert boldy. Kontserttik baǵdarlama aiasynda «Turan» etno-folklorlyq toby, Qazaqstannyń eńbek sińirgen qairatkeri Jamilia Jarqymbaeva jəne «Master-klass» bi-sport klýby, «Serper» dombyrashylar ansambli, Shalqyma» halyq bi ansambli, Muzart toby óner kórsetti.
