Búgin Indýstriia jáne infraqurylymdyq damý ministrliginde Armeniiada tirkelgen kólikterdiń qazaqstandyq ieleriniń múddesin qorǵaityn bastamashyl top ókilderimen kezdesý ótti, dep habarlaidy "Ult aqparat".
Kezdesý barysynda Indýstriia jáne infraqurylymdyq damý vitse-ministri A.Erjanov pen Ishki ister ministriniń birinshi orynbasary M.Qojaev Armeniia Respýblikasynan ákelingen kólikterdiń Qazaqstan aýmaǵynda erkin júrýi úshin saqtalýy tiis ulttyq jáne eýraziialyq zańnama normalaryn bastamashyl top ókilderine jan-jaqty túsindirip berdi.
Indýstriia jáne infraqurylymdyq damý vitse-ministriniń túsindirýinshe, Armeniiaǵa jeńildetilgen baj salyǵymen ákelingen kólikter sol eldiń aýmaǵynda ǵana júrýi tiis. Bul Armeniianyń Eýraziialyq odaqqa kirýi barysyndaǵy negizgi sharttardyń biri bolǵan. Sondai-aq ol Qazaqstan azamattarynyń armian biliginiń salǵyrttyǵy saldarynan avtomobilderdi Armeniiada turatyn azamat retinde tirkegendikterin atap ótti. Bul EAEO zańnamasyn buzý bolyp sanalady.
Al bastamashyl top ókilderi ózderi alyp kelgen kólikterdi tehnikalyq reglamentke sáikestigine qaramastan Qazaqstanda tirkeý úshin qajetti tólemderden bosatý arqyly zańdastyrýdy usyndy. Sonymen qatar olar 2020 jyldyń 1 naýryzynan bastap, Armeniiadan jeke tulǵalardyń avtomobil ákelýine tyiym salýdy nemese mundai kólik quraldaryna keminde 3 mln teńge saqtandyrý engizýdi usynyp otyr.
Óz kezeginde ókiletti organdardyń ókilderi qoldanystaǵy zańnamaǵa sáikes avtomobilderdi tirkeýge keńes berdi.
Kezdesý sońynda bul máseleni Indýstriia jáne infraqurylymdyq damý ministrligi alańynda talqylaýdy jalǵastyrý usynyldy. Sonymen qatar avtomobil ielerine zańsyz sherý ótkizý arqyly Qazaqstan zańnamasyn buzbaýǵa keńes berildi.
