Foto: ktf.kz
Elordada 1-9 qazan aralyǵynda Astana Open ATP 500 týrniri ótedi, - dep habarlaidy Tengrinews.kz.
Qazaqstanda mundai deńgeidegi jarys alǵash ret uiymdastyrylyp otyr. Bul ATP-nyń China Open jarysyn Beijińnen elordaǵa aýystyrý týraly sheshiminen keiin múmkin boldy.
ATP 500 "Úlken dýlyǵa" jáne ATP Masters 1000 dodalarynan keiingi úshinshi deńgeidegi jarys bolyp esepteledi. Oiyndar Esil jaǵasyndaǵy kórikti jerge oryn tepken Ulttyq tennis ortalyǵynyń korttarynda bolady.
"ATP-nyń Qazaqstanǵa osyndai deńgeidegi jarysty ótkizýdi senip tapsyrǵanyna qýanyshtymyn. Bul elimizde tennisti damytý úshin álemdik ozyq tájiribeni paidalanýdaǵy baǵytymyzdyń durystyǵyn kórsetedi", - dedi Qazaqstan tennis federatsiiasynyń prezidenti, Halyqaralyq tennis federatsiiasynyń (ITF) vitse-prezidenti Bolat Ótemuratov.
Taǵy bir atap ótetin jait, Astana Open-ge álemdegi úzdik 10 tennisshiniń qataryna kiretinder qatysqaly otyr. Sonyń ishinde álemniń 1-raketkasy, AQSh ashyq chempionatynyń jeńimpazy, reseilik Daniil Medvedev bar.
"Buǵan deiin biz 2020 jáne 2021 jyldary ATP 250 jarystaryn ótkizdik. Biylǵy jarystyń deńgeii odan da joǵary. Sonymen qatar Elek Rybakina Qazaqstan tarihynda alǵash ret Ýimbldon chempiony atanǵannan keiingi mereili jylda ótpekshi ári biyl federatsiianyń qurylǵanyna 30 jyl tolady", - dedi Bolat Ótemuratov.
