Nur-Sultan qalasynda bir top úlesker óz páterlerine kire almai júr. Sebebi qurylysy áli aiaqtalmaǵan. Májbúri qalmaǵan jandar QR Prezidentinen kómek surady, dep habarlaidy QazAqparat tilshisi.
Máselesi 2017 jyldan beri sheshilmei kele jatqan úleskerlerdiń endigi úmiti Prezidentte.
Elordadaǵy qurylysy aiaqtalmaǵan «Magistralnyi-3» turǵyn úi kesheniniń bir top úleskeri áleýmettik jeli arqyly Memleket basshysyna júginip, kómek surady.
Atalǵan máselege qatysty elorda ákimdiginiń ýákiletti uiymy «Elorda qurylys kompaniiasy» JShS resmi túsinik berdi.
«Nur-sultan qalasy ákimdiginiń turǵyn úi qurylysyna úlestik qatysý máseleleri jónindegi vedomstvoaralyq komissiia aiaqtalmaǵan qurylys nysandarynyń tizbesin qarady. Nátijesinde «Nurly jer» memlekettik baǵdarlamasy sheńberinde bólingen qarajat esebinen problemalyq nysandar qurylysyn aiaqtaýdy qarjylandyrý úshin «Elorda qurylys kompaniiasy» JShS ýákiletti uiymyna usynym beredi», - delingen habarlamada.
Habarlamada aitylǵandai, odan ári másele prokýratýraǵa jiberilip, sottyń sheshimi shyqqan.
«2019 jylǵy 31 shildede Nur-Sultan qalasy prokýrorynyń talap aryzy boiynsha qalalyq mamandandyrylǵan aýdanaralyq ekonomikalyq sotynyń sheshimimen «Jas otaý-Narrý Town» turǵyn úi qurylys kooperativi úleskerleriniń múddesinde «Atlant Injiniring» JShS «Kaztehbetonprodakts» JShS, «SIVF.KZ», «Saryarqa-Qurylys» JShS úlesker jarnasynyń sharttaryn buzý arqyly, qarajat óndirildi. Óndirilgen qarajat «Amanat-Komfort» turǵyn úi qurylysy kooperativine úlesker jarnasy retinde berildi», - dep habarlaidy kompaniia.
Sondai-aq, ákimdiktiń ýákiletti uiymy qurylysy jyrǵa ainalǵan «Magistralnyi-3» turǵyn úi keshenin salyp jatqan kompaniianyń ishki isine aralasa almaityndyǵyn jetkizip, onyń sebebin túsindirdi.
«Amanat-Komfort» turǵyn úi qurylysy kooperativi tóraǵasynyń is-áreketine qatysty atalǵan turǵyn úi qurylysy kooperativi jarǵy negizinde áreket etetin kommertsiialyq emes, ózin-ózi retteitin azamattar birlestigi ekenin habarlaimyz. Turǵyn úi qurylysy kooperativiniń ishki qarjy-sharýashylyq qyzmetine qatysty máseleler kooperativtiń jalpy jinalystarynda sheshiledi jáne QR «Turǵyn úi qatynastary týraly» zańymen retteledi. Úleskerler men turǵyn úi qurylysy kooperativi arasynda kelispeýshilik týyndaǵan jaǵdaida másele kelissózder nemese sot arqyly sheshiledi. Osy oraida ákimdik jáne ýákiletti uiym qoldanystaǵy zańnamaǵa sáikes turǵyn úi qurylysy kooperativiniń qyzmetine aralasýǵa quqyǵy joq», - deidi mekeme ókili.
Odan bólek, resmi jaýapta 2021 jylǵy 6 qyrkúiekte «Amanat-Komfort» TQK jáne «Nurqapstroigaz» JShS arasynda qurylysty aiaqtaý úshin birlesip qyzmet etý týraly shart jasasqany aitylǵan.
«Qazirgi ýaqytta «Magistralnyi-3» turǵyn úi kesheniniń jobalyq smetalyq qujattamasyna túzetý engizýine jáne «Memsaraptama» RMK-niń qaraýynda bolýyna bailanysty qurylys júrgizilmeidi. Jobany bekitýdiń boljamdy merzimi aqpannyń sońy», - degen jaýap aldyq.
