Elordada áleýmettik jelige rolik túsirý maqsatynda qoǵamdyq tártipti buzǵan kámeletke tolmaǵandar ustaldy. Bul jaiynda Nur-Sultan qalalyq Politsiia departamentinen málim etti, dep habarlaidy QazAqparat.
«Elordadaǵy bankterdiń biriniń menedjerinen «102» arnasyna belgisiz adamdardyń ǵimaratta júrgeni jáne klientterge qoqan-loqy jasaǵany týraly habarlama tústi. Oqiǵa ornyna jetken politsiia qyzmetkerleri faktini rastaǵan joq. Tekserý barysynda 14-15 jastaǵy úsh jasóspirimniń Dostyq kóshesi boiyndaǵy bank ǵimaratyna qarjy institýtyn ótirik tonaý videosyn túsirý úshin kirgeni anyqtaldy. Olar oiynshyq tapansha qoldanyp, video túsirim jasap, odan keiin boi tasalaǵan», - dep atap ótedi departamentten.
Politsiia qyzmetkerleri atalǵan úsh jasóspirimdi anyqtap, olardyń zańdy ókilderin ishki ister organyna shaqyrǵan. Balalardyń atap ótýinshe, olar rolik túsirýmen ainalysatyn kinoakademiiada tálim alady. Sabaq barysynda olarǵa tonaý sáti beinelengen rolik túsirý tapsyrmasy berilgen. Stsenariige orai qyz bala bank ǵimaratyna kirgennen keiin oiynshyq tapanshany seriktesine kezengen kezde úshinshisi oryn alǵan sátti kameraǵa túsirip alǵan. Osy ýaqytta bank ǵimaratynda ózge de kelýshiler bolǵan.
«Atalǵan fakti boiynsha kinoakademiia basshylyǵyna qatysty QR ÁQBtK-tiń 128-babymen ákimshilik is qozǵaldy. Kámeletke jasy tolmaǵandardyń qoǵamdyq tártipti buzǵany úshin olardyń zańdy ókilderi jaýapqa tartyldy. Ata-analarynyń ústinen QR ÁQBtK-tiń 435-babymen ákimshilik is qozǵalyp otyr. Jinalǵan materil protsessýaldyq sheshim qabyldaný úshin Nur-Sultan qalalyq kámeletke tolmaǵandar isi jónindegi mamandandyrylǵan aýdanaralyq sotyna jiberildi», - delingen vedomstvo aqparatynda.
