«Qaýipsiz aýla» pilottyq jobasy aiasynda qosymsha beinebaqylaý kamerasyn ornatý bastalady. Aldaǵy ýaqytta qalanyń halyq tyǵyz ornalasqan aýdandarynda 1 myń kamera ornatylady, dep habarlaidy "Ult aqparat" qala ákimdigine silteme jasap.
Beinebaqylaý kamerasy turǵyn úiler, áleýmettik nysandar jáne saiabaq aimaqtaryna ornatylady. Bul bastama quqyq buzýshylyq pen urlyq sanyn azaitýǵa baǵyttalǵan.
«Qarqyndy ózgerý kezinde jáne azamattardyń qaýipsizdigi úshin qalada jańa tehnologiialyq sheshim qajet. «Qaýipsiz aýla» pilottyq jobasy – bul bastamanyń alǵashqy qadamy. Kóppáterli úilerdiń aýlasynda abattandyrýdyń buzylýyn jáne qaýipsizdigin qadaǵalaityn beinebaqylaý kamerasymen qamtamasyz etý usynylady», delingen habarlamada.
Qazirgi ýaqytta jańa protsess pen quraldar synalyp jatyr. Beinekamera zańsyz áreketti anyqtaý jáne aldyn alý úshin aýladaǵy jaǵdaiǵa úzdiksiz monitoring júrgizedi.
Sondai-aq biyl jedel járdemniń, órt sóndirýshilerdiń jáne basqa da shuǵyl áreket etý qyzmetterdiń aýla aýmaǵyna kedergisiz ótýi úshin táýliktiń kez kelgen ýaqytynda shlagbaýmdardy avtomatty túrde ashýdy qamtamasyz etýge múmkindik beretin «aqyldy shlagbaým» pilottyq jobasy iske qosyldy.
