«Otbasy bank» AQ ortalyq filialynyń direktory Jansultan Matai «Elorda jastary» turǵyn úi baǵdarlamasynyń qashan iske qosylatynyn aityp berdi, dep habarlaidy QazAqparat.
«Bul – elorda jastaryn tolǵandyratyn ózekti máselelerdiń biri. Bul másele Memleket basshysynyń da, qala basshylyǵynyń da nazarynda. Biyl «Almaty jastary» baǵdarlamasy siiaqty elordada «Elorda jastary» baǵdarlamasy júzege asyrylady», - dedi Jansultan Matai tilshiler suraǵyna bergen jaýabynda.
Spiker bul jobany jergilikti atqarýshy organdar qarjylandyratyn bolǵandyqtan, bank pen ákimdik arasyndaǵy kelisimge áli qol qoiylmaǵanyn aitty. Biraq ákimdik bul baǵytta jumys istep jatyr.
«Osy jyldyń birinshi toqsanynda atalǵan másele boiynsha máslihat otyrysy ótýi kerek. Naqty kúnin aita almaimyn, biraq naýryz aiynda osy baǵdarlama bastalady dep aitýǵa bolady», - deidi Jansultan Matai.
