Elordada «Nur Otan» partiiasy astanalyq filialynyń Saiasi keńesi Biýrosy otyrys ótkizdi. Jiynda Nur-Sultan qalasy boiynsha partiianyń sailaýaldy baǵdarlamasyn iske asyrýdyń 2021-2025 jyldarǵa arnalǵan Jol kartasy bekitildi, dep habarlaidy partiianyń baspasóz qyzmeti.
Jol kartasynda 10 negizgi syn-táýekel anyqtalǵan: qoljetimdi turǵyn úimen qamtamasyz etý; úlestik qurylys; áleýmettik sala; shet aimaqtardy, qoǵamdyq keńistikter men aýlalardy damytý; gazdandyrý; joldar men qoǵamdyq kólik; nóser kárizi men tazartý qurylystary; ekologiia; qoǵamdyq qaýipsizdik jáne shaǵyn jáne orta biznesti damytý.
«Nur Otan» partiiasy óz sailaýaldy baǵdarlamasynda anyqtaǵandai, turǵyndardy tolǵandyratyn máseleler qala damýynyń basym baǵyttaryna endi. Onyń basty maqsaty – halyqtyń ómir súrý sapasy men ál-aýqatyn úzdiksiz jaqsartý úshin jaǵdai jasaý. Áleýmettik salaǵa, iaǵni bilim berý, densaýlyq saqtaý jáne halyqty áleýmettik qorǵaýǵa úlken kóńil bólinedi. Aldaǵy bes jylda 30 dárigerlik ambýlatoriia, jańa kópbeiindi aýrýhana men perzenthana salynady. Aldaǵy bes jylda úsh aýysymdy jáne bala sany kóp mektepterden tolyq arylý josparlanyp otyr. Ol úshin 50 jańa mektep salý kózdelgen», - deidi «Nur Otan» partiiasy Nur-Sultan qalalyq filialy tóraǵasynyń birinshi orynbasary Daýlet Káribek.
Elordanyń kóptegen turǵyndaryn alańdatyp otyrǵan ózekti másele – qoljetimdi turǵyn úimen qamtamasyz etý. Bul máseleni sheshý úshin jyl saiyn 10 myń páter salý josparlanýda.
«Jastar – bizdiń bolashaǵymyz. Elordada shamamen 250 myń jastar turady. Olarǵa jan-jaqty qoldaý kórsetiledi. Bul jumys isteitin jastarǵa arnalǵan «Elorda jastary» qalalyq turǵyn úi baǵdarlamasyn iske qosý, biznesti damytýǵa, oqýǵa jáne sportpen shuǵyldanýǵa qoldaý kórsetý», - deidi D. Káribek.
Turǵyn úi alaptarynda jaily jáne tolyqqandy ómir súrý úshin 130 km sýmen jabdyqtaý jáne sý burý jelileri, 85 km nóser kárizi, úsh nóser kárizin tazartý qurylystary kesheni, bir qosalqy stantsiia jáne 177 km elektrmen jabdyqtaý jelileri salynady. 500 aýlany jóndeý jáne abattandyrý josparlanǵan.
«Sapaly joldar men qoǵamdyq kóliktiń úzdiksiz jumys isteýi – elordadaǵy jaily ómirdiń mańyzdy quramdas bóligi. Jelilerdegi avtobýstar sany artady, marshrýttyq jeli jańǵyrtylady, bul qala turǵyndarynyń kópshiligine qoǵamdyq kólik qyzmetterin paidalanýǵa múmkindik beredi. 300 myń avtojúrgizýshige qolaily jaǵdai jasaý úshin 250-den astam kóshege jóndeý júrgizildi. Qazirgi ýaqytta qalada nóserge arnalǵan káriz jelileri men qurylystary salynyp jatyr. Bul jumystardyń aiaqtalýy – elordadaǵy ekologiialyq jaǵdaidy jaqsartady, ǵimarattar men úilerdi sý basý qaýpin azaitady, qalany taza etedi», - deidi spiker.
Sonymen birge, pandemiia ekonomikanyń barlyq salalaryna aitarlyqtai áser etti, biznesti júrgizýdiń álsiz tustaryn kórsetip, óz jumysyn qaita formattaýdy mindettedi. Bul rette 100 myńnan astam jańa jumys ornyn qurý josparlanyp otyr (jyl saiyn orta eseppen 27 myń jańa jumys oryndaryn ashý, granttar, jeńildetilgen nesieler, sýbsidiialar bólý jáne t.b.).
«Nur Otan» partiiasynyń sailaýaldy baǵdarlamasy – bizdiń qalamyzdyń 5 jylǵa arnalǵan damý jospary. Atalǵan josparlar men ýádelerdiń barlyǵyn oryndap, qol jetkizemiz», - deidi Dáýlet Káribek.
