Elorda turǵyny joq páterlerdi jalǵa bergen. 23 jastaǵy jas jigit 6 adamdy aldaǵan, – dep habarlaidy Polisia.kz.
Tergeý barysynda kúdiktiniń OLX habarlandyrýy arqyly joq páterlerdi jalǵa berý týraly jarnama ornalastyrǵany anyqtalǵan. Jábirlenýshiler qymbat emes baǵany kórip, habarlandyrý boiynsha qońyraý shalǵan.
Kúdikti telefonmen sóileskende óte sypaiy bop, aldyn ala tólem jasaý kerek dep shart qoiǵan. Jas jigit aqshany alǵannan keiin birden jarnamalardy alyp tastap, telefon nómirin aýystyrǵan. Onyń buryn rieltor bolyp jumys istegeni de belgili boldy.
Osylaisha 6 azamat alaiaqtyń ailasyna túsip, oǵan 30 myńnan 110 myń teńgege deiin aqsha aýdarǵan.
Atalǵan fakti boiynsha QR QK 190-baby boiynsha sotqa deiingi tergeý amaldary júrgizilip jatyr. Qazirgi ýaqytta onyń buryn jasalǵan osyǵan uqsas qylmystarǵa qatystylyǵy tekserilip, sondai-aq basqa da jábirlenýshiler anyqtalyp jatyr.
