Sáýir aiynyń ekinshi jartysynda Nur-Sultan turǵyndaryn jappai vaktsinalaý bastalady.
Bul týraly Nur-Sultan qalasy qoǵamdyq densaýlyq saqtaý basqarmasynyń basshysy Timýr Muratov aityp berdi, dep habarlaidy QazAqparat.
«Sáýirdiń ekinshi jartysynda halyqty jappai vaktsinalaýǵa kirisýdi josparlap otyrmyz. Qazirgi ýaqytta halyqtyń dekrettelgen toby ekpe alyp jatyr: dárigerler, pedagogtar, shuǵyl qyzmetter, áleýmettik mekemelerdiń kontingenti. Sonymen birge biz sozylmaly aýrýlary bar adamdardy vaktsinalaýdy bastadyq. Osy tusta túsinispeýshilik týyndap, tutas halyqty vaktsinalaý bastalyp ketti dep oilaityndar bar eken. Iá, bizdiń keibir emhanalarymyz vaktsinalaýdy bastady, biraq bul sozylmaly aýrýlary bar adamdar ǵana úshin, biz muny eskerip, olardy birinshi vaktsinalaýǵa tyrysamyz», - dedi T. Muratov elorda ákimdiginde ótken onlain brifingte.
Sonymen birge, basqarma basshysy vaktsinalaýdyń tegin júrgiziletinin eske saldy.
«Biz vaktsinalaýdy uiymdasqan túrde júrgizemiz. Emhanalar, egý kabinetteri arqyly ózimiz shaqyrýǵa tyrysamyz, biraq qajettilik týyndasa, mobildi toptardy qoǵamdyq oryndarǵa jiberýimiz múmkin. Kún jylynǵan soń, bul nusqa qarastyrylady», - deidi T. Muratov.
