Búgin Nur-Sultan qalalyq máslihaty Qurylys, ekologiia, kólik, saýda jáne turǵyn úi-kommýnaldyq sharýashylyq máseleleri jónindegi turaqty komissiiasynyń otyrysy ótti, dep habarlaidy "Ult aqparat".
Otyrysy barysynda Máńgilik el dańǵylynaǵy №35-úi Triýmfaldy arka turǵyn keshenin, oǵan irgeles aýmaq pen úi-jailardy sý basý máselesi talqylandy. Osy problemaǵa qatysty Esil aýdany ákiminiń orynbasary Qanat Abbas baiandama jasap, turǵyndarmen kún saiyn 2-3 ret kezdesý uiymdastyryp otyrǵanyn aitady.
«Esil aýdanynda qurylysy jumystary qarqyndy júrgizilip jatyr. Sondyqtan da bul problema jyldar boiy qordalanyp qalǵan. Aýdanda bir ǵana kollektor bar jáne onyń barlyq turǵyn úilerge qyzmet kórsetýge shamasy jetpeidi. Onyń ústine aýdanda erigen qar sý, káriz sýynyń 57 paiyzy osy kollektorǵa kelip quiylady. Sonyń saldarynan Máńgilik el, Álihan Bókeihan, Kerei men Jánibek handar, Saýran kósheleriniń boiyndaǵy úilerdiń jertólesin sý basqan», - dedi ol.
Onyń atap ótýinshe, sol jaǵalaýdaǵy problemany sheshý úshin uzyndyǵy 7,6 shaqyrymdy quraityn sý tazartý nysany salynady. Nysannyń jobasy, jobalyq-smetalyq qujattamasy, memlekettik saraptama qorytyndysy bar.
«Atalǵan nysan salynǵannan keiin problema sheshiledi ári aldaǵy ýaqytta mundai másele týyndamaidy», - dedi Qanat Abbas.
