1 naýryzda bastap muǵalimder men quqyq qorǵaý organdarynyń qyzmetkerleri koronavirýs infektsiiasyna qarsy vaktsinany saldyra bastady. KVI-dan alǵashqy ekpeni elordalyq №27 jáne №50 mektepterdiń muǵalimderi aldy, dep habarlaidy "Ult aqparat" qala ákimdiginiń resmi saityna silteme jasap.
Ekpeni alǵashqylardyń biri bolyp №27 mektep-litseiiniń qazaq tili men ádebieti pániniń muǵalimi Zibagúl Qarataeva qabyldady.
Osyǵan deiin ol dárigerdiń tiisti tekserisinen ótken bolatyn.
«Men vaktsinatsiiany óz erkimmen alǵym keldi. Bul eń aldymen ózińdi jáne týystaryńdy qorǵaý úshin qajet dep bilemin. Otbasymda koronavirýs infektsiiasymen aýyrǵan eshkim joq jáne juqtyrmas úshin osyndai tańdaý jasap otyrmyn. Bul - óz densaýlyǵyma degen jaýapkershilik», - deidi muǵalim.
Sonymen qatar, Zibagúl Qarataeva vaktsina qabyldaýda eshqandai qorqynysh joq ekenin aityp ótti.
«Dárigerlerdiń vaktsina qabyldaǵany jaily qanshama aqparat tarady, bárin oqyp otyrdyq, jaǵdaidy nazarda ustadyq. Jaǵymsyz jaǵdailar bolǵan joq. Sol sebepti senimdi boldym», - dep túsindirdi muǵalim.
Vaktsinanyń birinshi komponentin №27 orta mektep-litseiiniń direktory Qanat Baisalbaev ta qabyldady.
Ol ózin jaqsy sezinetinin, keri áseri bolmaǵanyn jetkizdi.
«Eger biz infektsiianyń taralýyn qalamasaq, ekpe qabyldaýymyz qajet. Onyń ústine oqýshylar birtindep synybyna oralyp jatyr. Al olardyń ata-analarymen biz kún saiyn kezdesip turamyz. Birin biri qaterge tigýge bolmaidy. Men mektep direktory retinde ekpe alyp, áriptesterime úlgi kórsetýge bel býdym», - dep atap ótti Qanat Baisalbaev.
Raiymbek batyr atyndaǵy №50 mektep-litseiiniń tarih pániniń muǵalimi Sailaýbai Shaikenov memleket usynǵan tegin vaktsinatsiiadan ótýdi azamattyq paryzy sanaidy.
«Memleket bizge qamqorlyq jasap, vaktsinatsiialaýdy usynyp otyr. Ótken jyl búkil adamzat úshin qiyn kezeń boldy. Virýstyń saldarynan qanshama adam qaitys boldy. Vaktsinanyń tiimdiligine senbesem, bul jerde otyrmas edim. Ózimdi, otbasymdy jáne oqýshylarymdy qaterden qorǵaǵym keledi», - deidi tarihshy.
